ރައްޔިތުންގެ މަޖިލީހުގެ 36 ދާއިރާއަކަށް ޖުމުހޫރީ ޕާޓީން ވާދަކުރާނެކަން އިއުލާންކޮށް ޓިކެޓު ދީފައިވާއިރު، ގޮނޑިތައް ހޯދުމަށް ދާންޖެހުނު ކޮންމެ ބަޔެއްގެ ކައިރިއަށް ދާނެ ކަމަށް ޕާޓީގެ ލީޑަރ ގާސިމް އިބްރާޙިމް ވިދާޅުވެއްޖެއެވެ.
ރޭ ޓިކެޓުތައް ދީފައިވާ މީހުންގެ ނަން އިއުލާންކޮށްފައިވާއިރު ޓިކެޓު ދީފައިވަނީ ކައުންސިލުން އެބާރު، ލީޑަރަށް ދިނުމުން ގާސިމެވެ. ގާސިމް ވިދާޅުވީ ޓިކެޓު ދެވޭނީ ގޮނޑި ކާމިޔާބުކުރެވޭނެ ގާބިލުކަން ހުރި ފަރާތްތަކަށް އެކަނި ކަމަށެވެ. ޕާޓީގައި ގިނަ ދުވަހު ހުރިޔަސް އެ ގާބިލުކަން ނެތް ބަޔަކަށް ޓިކެޓު ނުދެވޭނެ ކަމަށް ގާސިމް ވިދާޅުވިއެވެ.
އަދި އެ ގޮނޑިތައް ކާމިޔާބުކުރުމަށް ދާން ޖެހޭ ބަޔެއްގެ ކައިރިއަށް ޖޭޕީން ދާނެ ކަމަށްވެސް ގާސިމް ވިދާޅުވިއެވެ. ސީދާ އެއީ ކޮން ބަޔެއް ކަން ވިދާޅުނުވިނަމަވެސް ކުރީގެ ރައީސް ޔާމީނާއެކު މަސައްކަތް ކޮށްގެން މަޖިލިސް ގޮނޑިތައް ކާމިޔާބުކުރުމަށް ގާސިމް މަޝްވަރާ ކުރެއްވި ކަމަށް އަޑު ފެތުރިފައިވެއެވެ.
ރޭގެ ޖަލްސާގައި ގާސިމް ވިދާޅުވީ އެމަނިކުފާނުގެ އެއްވެސް "އެނެމީ" އެއް ނުހުންނާނެ ކަމަށެވެ. ނަމަވެސް ޔާމީން ވެރިކަމުގައި ހުންނެވިއިރު، އެމަނިކުފާނާ ދެކޮޅުވެ އިދިކޮޅު ކޯލީޝަނަށް ވަޑައިގެން ގާސިމް ވަނީ، އެކޮޅުކޮޅުން އެލުވާފައި ކާޅަށް ކޮށާ ކާންދިނަސް ޔާމީނާ އެއްކޮށް މަސައްކަތް ނުކުރައްވާނެ ކަމަށް ވިދާޅުވެފައެވެ.
އެމްޑީޕީން ވެރިކަން ލިބުމުން އަނެއްކާވެސް ޖޭޕީ "މަގުމަތިކޮށް"، އެއްލާލާފައިވާ ކަމަށް ވިދާޅުވެ ގާސިމް ވަނީ ފަހަކަށް އައިސް އެޕާޓީއަށް ވަރަށް ބޮޑަށް ފާޑުވިދާޅުވެފައެވެ.