އިޓާލިއަން ކަޕްގެ ކުއާޓާ ފައިނަލްގައި ރޭ އެޓަލާންޓާ އަތުން ހައިރާންކުރަނިވި ނަތީޖާއަކުން ބަލިވެ އެ މުބާރާތުގެ އެންމެ ފަހުގެ ޗެމްޕިއަން ޔުވެންޓަސް އިން ހުރިހާ މުބާރާތެއްގެ ތަށި ހޯދުމަށް ކުރަމުން އައި އުއްމީދުތައް ފުނޑުފުނޑުވެއްޖެއެވެ. ރޭގެ މެޗުން އެޓަލާންޓާ މޮޅުވީ 3-0 އިންނެވެ.
ވޭތުވެދިޔަ ހަތަރު އަހަރުގެ އިޓާލިއަން ކަޕްގެ ޗެމްޕިއަން ޔުވެންޓަސް އަތުން އެޓަލާންޓާ މޮޅުކޮށްދިނުމުގައި މިވަގުތު ރަނގަޅު ފޯމެއްގައި ހުރި އެ ޓީމަށް ކުޅޭ ކޮލަމްބިއާގެ ފޯވާޑް ޑުވާން ޒަޕާޓާ ވަނީ މުހިއްމު ދައުރެއް އަދާކޮށްފައެވެ. އެގޮތުން، އޭނާ ވަނީ މި މެޗުގައި ދެލަނޑުޖަހައިދީފައެވެ.
އިޓާލިއަން ލީގުގައި މި ދެ ޓީމު އެންމެ ފަހުން ބައްދަލުކުރި މެޗުގައި، އެޓަލާންޓާގެ ދަނޑުގައި މިދިޔަ ޑިސެންބަރު މަހުގައި ކުޅުނު މެޗު 2-2 އިން އެއްވަރުވެގެން ނިމުނުއިރު އެ މެޗުގައިވެސް އެ ޓީމުގެ ދެ ލަނޑުޖަހައިދިނީވެސް ޒަޕާޓާ އެވެ.
ރޭގެ މެޗަށް ނިކުތްއިރު ޔުވެންޓަސް އަށް ދިމާވެފައިވާ އެންމެ ބޮޑު މައްސަލައަކީ އަނިޔާގެ ސަބަބުން އެ ޓީމުގެ އިތުބާރު ޑިފެންޑަރު ލިއޮނާޑޯ ބޮނޫޗީ އަށް މި މެޗުގައި ނުކުޅެވުމެވެ. ރޭގެ މެޗުގައި ބޮނޫޗީގެ ބަދަލުގައި އެ ޓީމުގެ ފުރަތަމަ އެގާރައިގައި ހިމަނާފައިވަނީ ޑެނިއެލީ ރުގާނީ އެވެ. މީގެއިތުރުން، މިވަގުތު އެ ޓީމުގެ އަނިޔާގައި ތިބި ކުޅުންތެރިންގެ ތެރޭގައި ހުއާން ކުއަޑްރާޑޯ އާއި މާރިއޯ މަންޒުކިޗް ހިމެނެއެވެ.
އެޓަލާންޓާގެ ދަނޑުގައި ރޭ ކުޅުނު މި މެޗުގެ 27 ވަނަ މިނެޓުގައި ޔުވެންޓަސްގެ ކެޕްޓަން ޖިއޯޖިއޯ ކިއެލީނީ އަށް އަނިޔާވުމުން އެ ޓީމުގެ ޑިފެންސްލައިނަށް ވަނީ މައްސަލަތައް ކުރިމަތިވެފައެވެ. އޭނާގެ ބަދަލުގައި ކުޅެން ނިކުމެފައިވަނީ ޕޯޗުގަލްގެ ފުލްބެކް ޖޮއާއޯ ކަންސޭލޯ އެވެ.
މި މެޗުގައި އެޓަލާންޓާ އިން ކާމިޔާބުކުރި ފުރަތަމަ ލަނޑު، 37 ވަނަ މިނެޓުގައި ޖަހައިދިނީ ޓިމޮތީ ކަސްޓާނިއޭ އެވެ. މިއީ ޔުވެންޓަސްގެ ފުލްބެކް ކަންސޭލޯ އަށް ހެދުނު ގޯހެއްގެ ފައިދާނަގައި ގޯލްގެ ތިރީކަނަށް އަމާޒުކޮށްލައިގެން ކަސްޓާނިއޭ ކާމިޔާބުކުރި ގޯލެކެވެ.
އޭގެ ދެ މިނެޓުފަހުން، އެޓަލާންޓާގެ ޒަޕާޓާ ވަނީ އެ ޓީމުގެ ލީޑް ފުޅާކޮށްދީފައެވެ. މިއީ ޔުވެންޓަސްގެ ކުޅުންތެރިން ދިފާއުކުރަން އުޅުމުގެ ތެރޭގައި ހެދުނު ގޯހެއްގެ ފައިދާނަގައި ޒަޕާޓާ ކާމިޔާބުކުރި ގޯލެކެވެ. އެޓަލާންޓާގެ މި ގޯލަށް ފަހު ހިތްހަމަނުޖެހުން ފާޅުކުރުމުން ރެފްރީ ވަނީ ޔުވެންޓަސްގެ ކޯޗު މަސިމިލިއާނޯ އަލެގްރީ ބެންޗުން ފޮނުވާލައިފައެވެ. މި ހާފު ނިމުނީ 2-0 އިން އެޓަލާންޓާ ކުރީގައިއޮވެގެންނެވެ.
ދެވަނަ ހާފުގައި ޔުވެންޓަސް އަށް ފަރަގު ކުޑަކޮށްދިނުމަށް އެ ޓީމުގެ ސާމީ ކެދީރާ އަށް ވަނީ ލަނޑުޖެހުމަށް ރަނގަޅު ފުރުޞަތެއްލިބި ބޭކާރުވެފައެވެ. ކެދީރާ ވަރަށް ރީއްޗަށް އެއްފަހަރުން ފޮނުވާލި ހަމަލާ އެޓަލާންޓާގެ ގޯލްކީޕަރު އެޓްރިޓް ބެރީޝާ ވަނީ މަތަކޮށްފައެވެ.
މެޗު ނިމެން ހަތަރު މިނެޓަށްވެފައިވަނިކޮށް، އެޓަލާންޓާގެ ތިންވަނަ ލަނޑުޖަހައިދިނީ ޒަޕާޓާ އެވެ. މިއީ ޔުވެންޓަސްގެ ފުލްބެކް މަޓިއާ ޑި ޝީލިއޯ އަށް ހެދުނު ގޯހެއްގެ ފައިދާނަގައި އެ ޓީމުގެ ގޯލްކީޕަރު ވޮޝިއެކް ޝެޒްނީ ކައިރިން ނައްޓާލުމަށްފަހު ޒަޕާޓާ ކާމިޔާބުކުރި ރީތި ގޯލެކެވެ. މި ގޯލާއެކު އޭނާ ވަނީ އެޓަލާންޓާ އަށް އެންމެ ފަހުން ކުޅުނު 10 މެޗުގައި 17 ލަނޑުޖަހައިދީފައެވެ.
އިޓާލިއަން ކަޕްގައި ރޭ ކުޅުނު އަނެއް މެޗުގައި އޭއެސް ރޯމާ ވެސް ވަނީ ރޭ ލަދުވެތި ގޮތަކަށް ފިއޮރެންޓީނާ އަތުން 7-1 އިން ބަލިވެ ސެމީ އަށް ނުގޮސް ކަޓައިފައެވެ.
މި މުބާރާތުގެ ސެމީ ފައިނަލުގެ ފުރަތަމަ މެޗުގައި އޭސީ މިލާން ނިކުންނާނީ މިރޭ ކުޅެވޭ މެޗުގައި އިންޓަ މިލާނާއި ލާޒިއޯ ކުޅެ މޮޅުވާ ޓީމަކާ ދެކޮޅަށެވެ. ސެމީގެ ދެ ވަނަ މެޗުގައި ބައްދަލުކުރާނީ ފިއޮރެންޓީނާ އާއި އެޓަލާންޓާ އެވެ.