ސްޕެއިނުގެ ބާސެލޯނާ އަށް ކުޅެމުން އަންނަ ސްޕެއިނުގެ ޑެނިސް ސުއަރޭޒް ލޯން އެއްބަސްވުމެއްގެ ދަށުން މިއަހަރުގެ ޖޫން މަހުގެ ނިޔަލަށް އިނގިރޭސި ކްލަބު އާސެނަލަށް ބަދަލުވާން އެއްބަސްވެއްޖެއެވެ.
ޑެނިސް ސުއަރޭޒް އާސެނަލަށް ބަދަލުވިކަން އެ ކްލަބުގެ ރަސްމީ ފޭސްބުކް އަދި ޓުވިޓާ އެކައުންޓުން ކަށަވަރުކޮށްދީފައިވާއިރު އޭނާ ވަނީ ބާސެލޯނާ އާއެކު ހަދާފައިވާ އެއްބަސްވުމުގެ މުއްދަތު 1 އަހަރަށް އިތުރުކޮށްފައެވެ. އެގޮތުން، އޭނާގެ އެއްބަސްވުން 2021 ވަނަ އަހަރުގެ ޖޫން މަހުގެ ނިޔަލަށް އޮތްނަމަވެސް މި ސީޒަނަށް ފަހު އާސެނަލަށް ދާއިމީ އެއްބަސްވުމެއް ދަށުން ބަދަލުވުމުގެ ފުރުޞަތުލިބިގެންވެއެވެ.
އާސެނަލްގެ ކޯޗު އެމެރީ ވަނީ ޑެނިސް އެ ކްލަބާ ގުޅުމުން އުފާވާކަމަށާއި އޭނާގެ ފަރާތުން ރަނގަޅު ކުޅުމެއް ފެނިގެންދާނެކަމަށް ބުނެފައެވެ. މީގެއިތުރުން، އޭނާގެ ފަރާތުން އެ ޓީމަށް އެހީތެރިކަން ލިބި ފައިދާތަކެއް ކުރާނެކަމަށް ބުނެފައިވެއެވެ.
"ޑެނިސް ސުއަރޭޒް މި ޓީމާ ގުޅުމުން އަހަރެމެން މި ތިބީ ވަރަށް އުފަލުން. އަހަރެން މީގެ ކުރީން އޭނާ އާއެކު މަސައްކަތްކޮށްފައިވާތީވެ އޭނާ އަކީ އަހަރެންނަށް ވަރަށް ރަނގަޅަށް އެނގޭ ކުޅުންތެރިއެއް. އޭނާ އަކީ އެޓޭކުގެ ގިނަ މަގާމުތަކަށް ކުޅެވޭ މޮޅު ކުޅުންތެރިއެއް. އޭނާގެ ފަރާތުން މި ޓީމަށް އެހީތެރިކަން ލިބޭނެ." އެމެރީ ބުންޏެވެ.
R E U N I T E D 🤝 pic.twitter.com/N4rFGjl5ct
— Arsenal (@Arsenal) January 31, 2019
މިޑްފީލްޑްގެ ގިނަ މަގާމްތަކަށް ކުޅެވޭ ޑެނިސްގެ ސީނިއާ ކެރިއަރު 2011 ވަނަ އަހަރު މެންޗެސްޓާ ސިޓީ އިން ފެށިނަމަވެސް އެ ޓީމަށް މާގިނަ މެޗުތަކެއް ކުޅެފައެއްނުވެއެވެ. އޭގެފަހުން ބާސެލޯނާ އަށް 2013 ވަނަ އަހަރުގައި ބަދަލުވެ އެ ޓީމުގައި ހޭދަކުރީ ދުވަސްވަރު ލޯން އެއްބަސްވުމެއްގެ ދަށުން އާސެނަލްގެ މިހާރުގެ ކޯޗު އުނާއި އެމެރީ އާއެކު ވަނީ ސެވިއްޔާގައި ވެސް މަސައްކަތް ކޮށްފައެވެ. އެގޮތުން އޭނާ ވަނީ އެ ޓީމާއެކު 2014/2015 ވަނަ އަހަރުގެ ސީޒަނުގައި ޔުއެފާ ޔުރޮޕާ ލީގު ކާމިޔާބުކޮށްފައެވެ. އެއަށްފަހު ޖެހިގެން އައި ސީޒަނަށް އޭނާ ވަނީ ވިޔާރެއާލަށް ބަދަލުވެފައެވެ. އެހެންނަމަވެސް، އެ ޓީމުގައި އެއް ސީޒަން ހޭދަކުރުމަށްފަހު ބާސެލޯނާ އިން ވަނީ އަނބުރާ އޭނާ ކްލަބަށް ގެނެސްފައެވެ.
ޑެނިސް ވަނީ ބާސާއާއެކު ސްޕެނިޝް ލީގު އެއް ފަހަރު، ކޮޕާ ޑެލްރޭ އަދި ސްޕެނިޝް ސުޕަ ކަޕް ދެ ފަހަރު ކާމިޔާބުކޮށްފައެވެ. އޭނާ އެ ކްލަބަށް މިހާތަނަށް ކުޅެދިިން 71 މެޗުގައި 8 ގޯލް ކާމިޔާބުކޮށްދީފައިވާއިރު މި ސީޒަނުގައި އެ ޓީމަށް ކުޅެދީފައިވަނީ އެންމެ 8 މެޗެވެ.
ސްޕެއިނުގެ 19 އަހަރުން ދަށުގެ ގައުމީ ޓީމާއެކު 2012 ވަނަ އަހަރު ޔޫރަޕިއަން ޗެމްޕިއަންޝިޕް ކާމިޔާބުކޮށްފައިވާ ޑެނިސް ވަނީ ސްޕެއިނުގެ އެކި އުމުރުފުރާތަކުގެ ޓީމުތަކުގެ އިތުރުން ސީނިއާ ޓީމަށް މިހާތަނަށް 1 މެޗު ކުޅެދީފައެވެ.
އާސެނަލްގައި ޑެނިސް ބޭނުންކުރާނީ 22 ނަންބަރު ޖާޒީއެވެ.