ފާއިތުވި 10 އަހަރުގެ ތެރޭގައި ވެސް އެމެރިކާގެ މޫސުން ފިނިނުވާހާ މިންވަރަށް ފިނިގަދަވުމުގެ ސަބަބުން މިހާތަނަށް 21 މީހުން މަރުވެފައިވާ ކަމަށް ރިޕޯޓްތައް ބުނެފި އެވެ.
އެމެރިކާގެ އާބާދީގެ ތިންބައިކުޅަ އެއްބައި މީހުން (ގާތްގަނޑަކަށް 90 މިލިއަން މީހުން) ވަނީ -17 ޑިގްރީ ސެލްސިއަސްގެ ފިނިހޫނުމިން ތަހައްމަލްކުރަން ޖެހިފައެވެ. ޖުމްލަ ގޮތެއްގައި ގާތްގަނޑަކަށް 250 މިލިއަން މީހުންނަށް ވަނީ "ޕޯލާ ވޯޓެކްސް"ގެ ޙާލަތާއި ކުރިމަތިލާން ޖެހިފައެވެ.
އެންޓާޓިކާގެ ފިނިހޫނުމިނަށްވުރެ ވެސް އެމެރިކާގެ ބައެއް ސަރަޙައްދުތައް ފިނިގަދަވެފައިވާއިރު، "ފްރޮސްޓްބައިޓް"ގެ ސަބަބުން ހޮސްޕިޓަލްތަކުގައި ގިނަ އަދަދެއްގެ މީހުންނަށް ދަނީ ފަރުވާދެމުންނެވެ. ފްރޮސްޓްބައިޓް އަކީ މާބޮޑަށް ފިނިގަދަވުމުގެ ސަބަބުން ހަށިގަނޑުގެ ޓިޝޫތަކަށް ލިބޭ ގެއްލުމަށް ކިޔާ ނަމެކެވެ.
މި ހަފްތާ ބަންދު ނިމިގެންދާއިރު ފިނިހޫނުމިން އެވަރެޖު މިންވަރަށްވުރެ މައްޗަށްދާނެ ކަމަށް ލަފާކުރެވެއެވެ.
މިކަމުގެ އަސަރު އެންމެ ބޮޑަށް ކުރަނީ ގެދޮރު ނެތި މަގުމަތީގައި ދިރިއުޅެމުންދާ ފަޤީރުންނަށެވެ. އެފަދަ މީހުންނަށް އެހީތެރިކަން ފޯރުކޮށްދިނުމުގެ އެކި ސިޓީތަކުގައި ބޯހިޔާވަހިކަމުގެ ނިޒާމުތައް ވަނީ ހަމަޖައްސާފައެވެ.
އެހެންނަމަވެސް ގަދަ ފިނީގެ އަސަރު ދަނީ އެތައް ބަޔަކަށް ކުރަމުންނެވެ. އެގޮތުން އޮހާއިއޯގެ ލޮރެއިންގެ ފަޅު ގެއެއްގެ ތެރެއިންވެސް އުމުރުން 60 އަހަރުގެ އަންހެނަކު ގަނޑުވުމުގެ ސަބަބުން މަރުވެފައި އޮއްވާ ވަނީ ފެނިފައެވެ.