ސަރުކާރު ހިންގާ މައި ޕާޓީ، އެމްޑީޕީގެ ފިކުރާއި ޕީޕީއެމްގެ ފިކުރާ ދިމަލެއް ނުވާނެ ކަމަށާއި އެޕާޓީ ނޫން އެހެން ކޮންމެ ޕާޓީއަކާ ކޯލިޝަން ހަދަން ޕީޕީއެމުން ތައްޔާރަށް އޮތް ކަމަށް ޕާޓީގެ ލީޑަރ، ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ވެރިކަމުން ފައިބައިވަޑައިގެންނެވި ފަހުން ކެމެރާތަކާއި ފަލަ ސުރުޚީތަކުން ވަރަށް ދުރުގައި ހުންނެވުމަށް ފަހު ރައީސް ޔާމީން އަނެއްކާވެސް ރޭ ފެނިގެން ދިޔައީ، ޕީޕީއެމްގެ ކުރީގެ ނައިބު ރައީސް އަބްދުއްރަހީމް އަބްދުﷲ އުފެއްދެވި ކޮންގްރެސް ޕާޓީއާ އެކު ކޯލިޝަން ހެދުމަށް ބޭއްވި ޖަލްސާއެއްގައެވެ.
އެ ޖަލްސާގައި ރައީސް ޔާމީން ވަނީ ނޫސްވެރިޔަކު ޖުމުހޫރީ ޕާޓީއާ ގުޅިދާނެތޯ އެއްސެވުމުން ވަރަށް ކުރު ގޮތަކަށް ޖަވާބު ދެއްވާފައެވެ. ސީދާ ޖަވާބެއް ޔާމީން ނުދެއްވި ނަމަވެސް ވިދާޅުވީ އެއީ ކުރެވިދާނެ ކަމެއް ކަމަށެވެ. އަދި އެބޭފުޅުންނަކީ(ޕީޕީއެމް، ޕީއެންސީ) އަކީ އަބަދުވެސް މަޝްވަރާއަށް ތައްޔާރަށް ތިއްބެވި ބޭފުޅުން ކަމަށް ވިދާޅުވިއެވެ.
ހަމައެކަނި ކޯލިޝަނެއް ނެހެދޭނީ އެމްޑީޕީއާއި ކަމަށާއި އެއީ މުޅިން ތަފާތު ދެފިކުރު ކަމަށް ދެކެވަޑައިގަންނަވާ ކަމަށް ޔާމީން ވިދާޅުވިއެވެ.
"އަޅުގަނޑު ޕާޓީއެއްގެ ލީޑާޝިޕްގައި ހުރެގެން، އަޅުގަނޑަށް ކޯލިޝަން ހެދުމަށް ވާހަކަ ދައްކަން އުނދަގޫ ވާނީ ހަމައެކަނި އެމްޑީޕީއާ. މިއީ ތަފާތު ދެ ފިކުރު ދެއްތޯ. އެހެން ކޮންމެ ބަޔަކާ ވެސް އަޅުގަނޑުމެނާ ވާހަކަ ދެއްކޭނެ. ތިޔަ ފުރުސަތު އަޅުގަނޑުމެން ހޯދާނަން ވެސްމެ، އެ ފުރަސަތު އޮތް ކަމުގައި ވާނަމަ،" ޔާމީން ވިދާޅުވިއެވެ.
ކޮންގްރެސް ޕާޓީ އުފެއްދީ ކުރީގެ ރައީސް ޔާމީންގެ އަތުން ޕީޕީއެމް ނެގުމަށް ކޯޓަށް މައްސަލައެއް ހުށައެޅުމުންނެވެ. އޭރު ޔާމީން ވިދާޅުވީ، ކަންކަން ދާ ގޮތުން ޕީޕީއެމް އެމަނިކުފާނު އަތުން ދޫވެގެން ހިނގައިދާނެ ކަމަށް ބެލެވޭ ކަމަށާއި އާ ޕާޓީއެއް އުފައްދަން ވެސް ޖެހިދާނެ ކަމަށެވެ.
ނަމަވެސް ކޯޓު ހުކުމް ޔާމީނާ އެއްކޮޅަށް ނިމިފައިވާއިރު ޕާޓީ އުފެއްދި ކުރީގެ ރައީސް މައުމޫން ވަނީ އެމަނިކުފާނު އަމިއްލަ ޕާޓީއެއް އުފެއްދުމުގެ މަސައްކަތް ފައްޓަވާފައެވެ.