އިއްޔެ އައްޑޫ ސިޓީ މަރަދޫފޭދޫގެ ދެބުރި އިމާރާތެއް މަތިން ވެއްޓުނު ކުއްޖާ އިތުރު ފަރުވާއަށް ރޭ ދަންވަރު މާލެ ފޮނުވައިފިއެވެ.
މަރަދޫފޭދޫ "ގުރުވަ" ނަމަކަށް ކިޔާ ގެއެއްގެ ދެވަނަ ބުރިން ވެއްޓިފައިވަނީ އުމުރުން 7 އަހަރުގެ ފިރިހެން ކުއްޖެކެވެ. އިއްޔެ މެންދުރު ފަހު ހިނގި މިހާދިސާއަށް ފަހު އެ ކުއްޖާ ހިތަދޫ ރީޖަނަލް ހޮސްޕިޓަލަށް ގެންގޮސްފައިވާއިރު ހޮސްޕިޓަލުން ބުނީ އިތުރު ފަރުވާއަށް އެމަޖެންސީގައި މާލެ ފޮނުވަން ޖެހޭ ކަމަށެވެ.
ހިތަދޫ ރީޖަނަލް ހޮސްޕިޓަލުން މައުލޫމާތު ދީފައިވާ ގޮތުގައި އެކުއްޖާގެ ބޮލަށް ވަނީ އަނިޔާތަކެއް ލިބިފައެވެ. އަދި ފުރުވާލެވުނު އިރުވެސް ކުއްޖާގެ ހާލު ސީރިއަސް ކަމަށް މައުލޫމާތު ދީފައިވެއެވެ.