އިރުއުތުރު އޮސްޓްރޭލިއާ އަށް ކުރަމުންދާ ވިއްސާރައިގައި ކުއީންސްލޭންޑަށް ބޯކޮށް ވާރޭވެހި، މަގުތަކުގައި ފެންބޮޑުވެއްޖެ އެވެ.
ކުއީންސްލެންޑް ސްޓޭޓްގެ ޓައުންސްވިލް ސިޓީގެ މަގުތަކުގައި އާންމު ދިރިއުޅުމަށް ބުރޫއަރާ ވަރަށް ފެންބޮޑުވުމުގެ ސަބަބުން މީހުން ހުސްކުރުމުގެ މަސައްކަތް އިމާޖެންސީ ކްރޫއިން ދަނީ ކުރަމުންނެވެ.
އޮފިޝަލުންނާއި ހަވާލާދީ "ބީބީސީ" އިން ރިޕޯޓްކުރާ ގޮތުގައި ވާރޭ ވެހުން ހުއްޓުމެއްނެތި ކުރިއަށްދާނަމަ، ގާތްގަނޑަށް 20،000 ގެތަކަށް ފެންބޮޑުވުމުގެ އަސަރުކުރާނެ ކަމަށެވެ. ކުރިއަށް އޮތް ދުވަސްތަކުގައި އިތުރަށް ވާރޭވެހޭނެ ކަމަށް އޮފިޝަލުން ލަފާކުރެއެވެ. ގެތަކަށް ފެން ނުވަންނާނެ ގޮތަށް ވެލިބަސްތާ ޖެހުމުގެ މަސައްކަތް ސިފައިން ދަނީ ކުރަމުންނެވެ.
އުތުރު ކުއީންސްލެންޑްގައި ޑިސެމްބަރު މަހުން ފެށިގެން އޭޕްރީލް މަހުގެ ނިޔަލަށް އޮންނަނީ ވާރޭ މޫސުމެވެ. ނަމަވެސް ޓައުންސްވިލް އަށް މިހާރު ކުރަމުންދާ ވިއްސާރައަކީ ވަރަށް މަދުން ނޫނީ އެ ސަރަޙައްދުގައި ނުފެންނަ ކަމެކެވެ.
ޓައުންސްވިލް އަށް މިހާރު ވިއްސާރަކުރަމުންދާއިރު، ދެކުނު އޮސްޓްރޭލިއާގެ ސަރަޙައްދުތަކުގެ ފިނިހޫނުމިން ވަނީ ވަރަށް ބޮޑަށް މައްޗަށް ގޮސްފައެވެ. އެގޮތުން މާބޮޑަށް ހޫނުގަދަވުމުގެ ސަބަބުން ޓަސްމޭނިއާގެ ޖަންގަލިތަކުގައި އަލިފާން ވެސް ވަނީ ރޯވެފައެވެ.
މިދިޔަ ޖެނުއަރީ މަހަކީ މިހާތަނަށް އޮސްޓްރޭލިއާގައި ރެކޯޑް ކުރެވުނު އެންމެ ހޫނުގަދަ މަހެވެ.