އިރުދެކުނު އިރާންގެ މިލިޓަރީ ބޭސް އަކަށް ދިން ހަމަލާއެއްގައި އިރާންގެ ރިވޮލިއުޝަނަރީ ގާޑްސްގެ މެމްބަރަކު މަރުވެ، އިތުރު ފަސް މެމްބަރަކަށް އަނިޔާވެއްޖެ ކަމަށް މީޑިއާ ރިޕޯޓްތައް ބުނެފި އެވެ.
މިއަދު މި ހަމަލާ ދީފައި ވަނީ އިރާންގެ އިސްލާމީ އިންޤިލާބަށް 40 އަހަރު ފުރުމުގެ މުނާސަބަތް ރަސްމީކޮށް ފާހަގަކުރަމުން ދަނިކޮށެވެ.
އިރާންގެ ޕްރޮވިންޝަލް ޑެޕިއުޓީ ގަވަރުނަރު ފޯ ސެކިއުރިޓީ އެފެއާޒް، މުހައްމަދު ހަދީ މަރަޝީ "އައިއާރްއެންއޭ" ނޫހަށް މަޢުލޫމާތު ދިން ގޮތުގައި އެ ހަމަލާ ދީފައި ވަނީ ބަސިޖް މިލިޓަރީ ފޯސްގެ ބޭސް އަކަށް ކަމަށެވެ. ރިވޮލިއުޝަނަރީ ގާޑްސް އާއި ގުޅިގެން މަސައްކަތް ކުރާ ބަސިޖްގެ އެ ބޭސް ހުންނަނީ ސިސްޓަން ބަލޫޗެސްޓަން ޕްރޮވިންސްގެ ނިކް ޝަހަރް ސިޓީގަ އެވެ.
މިއަދު ހެނދުނު އެ ބޭސްއަށް ދިން ހަމަލާގައި ހަތަރު ގާޑުންނަށް އަނިޔާވެފައިވާއިރު، އެކަކު ވަނީ މަރުވެފަ އެވެ. މަރުވެފައި ވަނީ މޯޓެޒާ އަލީއަހްމަދީ ނަމަކަށް ކިޔާ މީހެކެވެ.
މި ހަމަލާގެ ޒިންމާ ސުންނީ ހަނގުރާމަވެރި ގްރޫޕަކުން ވަނީ ނަގާފައެވެ.
މިދިޔަ ހަފްތާގައި ވެސް ޒަހޭދާން ސިޓީ އަށް ދިން ބޮމުގެ ހަމަލާއެއްގައި ތިން ފުލުހަކަށް ވަނީ އަނިޔާވެފައެވެ. އެ ހަމަލާގެ ޒިންމާ ޖައިޝް އަލް-އަދުލު އިން ވަނީ ނަގާފައެވެ.