ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އަދި ކުރީގެ ބަންޑާރަ ނައިބް ޢާއިޝަތު އާޒިމާ ޝަކޫރު، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަނުކުރައްވަން ނިންމަވައި، ޕީޕީއެމްގެ ޓިކެޓް ދޫކޮށްލަވައިފި އެވެ.
އެނގިފައިވާ ގޮތުގައި އާޒިމާ އެގޮތަށް ނިންމެވީ އެކަމަނާގެ ސިއްޙީ ހާލަތު ތަން ނުދޭތީ ކަމަށެވެ.
ޕްރައިމަރީ ބޭއްވުމެއް ނެތި ރައްޔިތުންގެ މަޖިލީހުގެ އިންތިޚާބުގައި ޕީޕީއެމްގެ ފަރާތުން ނ. ހޮޅުދޫ ދާއިރާއަށް ވާދަކުރެއްވުމަށް އާޒިމާ އަށް ޓިކެޓް އަރުވާފައި ވަނީ މިދިޔަ ޑިސެމްބަރ މަހުގެ ކުރީކޮޅު އެވެ. އެހެންނަމަވެސް ޕީޕަލްސް ނެޝަނަލް ކޮންގްރެސް (ޕީއެންސީ) އާއި ޕީޕީއެމް އިން ކޯލިޝަން ހަދައި، ދެ ޕާޓީގެ ފަރާތުން މަޖިލިސް އިންތިޚާބަށް ވާދަކުރައްވާ ބޭފުޅުންގެ ނަން އިއުލާންކުރިއިރު، ހޮޅުދޫ ދާއިރާއަށް ވާދަ ކުރާނެ ކަމަށް ބުނެފައި ވަނީ އަހުމަދު ހަމްދާން ނާސިރު އެވެ.
ޕީޕީއެމް އާއި ޕީއެންސީ ކޯލިޝަން ހަދާފައިވާއިރު ކުރިއަށް އޮތް މަޖިލިސް އިންތިޚާބުގައި މި ދެ ޕާޓީ ގުޅިގެން މަޖިލީހުގެ 63 ދާއިރާއަކަށް ވާދަކުރާނެކަން މިހާތަނަށް ވަނީ އިއުލާންކޮށްފައެވެ.
ޕީޕީއެމްގެ ތަރުޖަމާނު އަބްދުލްމަތީން ރޭ ވިދާޅުވީ 63 ދާއިރާގެ އިތުރުން ވެސް އިތުރު ދާއިރާތަކަކަށް މި ދެ ޕާޓީ ގުޅިގެން ވާދަކުރުމަށް ހަމަޖެހިފައިވާ ކަމަށާއި އަދި ބައެއް ދާއިރާތަކުގައި ޕްރައިމަރީ ވެސް ބާއްވާނެ ކަމަށެވެ. އެގޮތުން ޕްރައިމަރީ ބާއްވަންޖެހޭ ދާއިރާތަކުގައި މި މަހުގެ 8 ވަނަ ދުވަހު ޕްރައިމަރީ ބޭއްވުމަށް ހަމަޖެހިފައިވާ ކަމަށް އޭނާ ވިދާޅުވިއެވެ.