ސްޓާރ ޕްލަސް އިން ދައްކަމުން އައި ޑާންސް ޕްލަސްގެ 4 ވަނަ ސީޒަން ޗޭތާން ސާލުންކީ ކާމިޔާބުކޮށްފިއެވެ.
ޗޭތާން މި މުބާރާތް ކާމިޔާބު ކުރުމުން އޭނާއަށް ވަނީ މުބާރާތުގެ ގޯލްޑަން ތަށި އަދި 25 ލައްކަ އިންޑިއަން ރުޕީސް ލިބިފައެވެ.
6 އޮކްޓޯބަރ 2018އިން ފެށިގެން 18 ހަފްތާ ވަންދެން ދައްކަމުންއައި މި ޑާންސް ރިއަލިޓީ ޝޯވގެ ގްރޭންޑް ފިނާލޭ ދައްކާފައިވަނީ 2 ފެބްރުއަރީ ވީ ހޮނިހިރު ދުވަހުގެ ރޭ ރާއްޖެ ގަޑިން 7:30އިން ފެށިގެން 3 ގަޑިއިރަށް ދެމިގެންދިޔަ ޕްރޮގްރާމެއްގައި ސްޓާރ ޕްލަސްއިންނެވެ.
މި ޝޯވ ޗޭތަން ވަރަށް ފުރިހަމައަށް ކާމިޔާބު ކޮށްފައިވާ އިރު ޝޯވގެ 2 ވަނަ ހާސިލްކޮށްފައިވަނީ ސޫޖަން އަދި އާންޗަލްއެވެ. އަދި ތިންވަނަ ލިބިފައިވަނީ ވަރްތިކާ ޖާ އަށެވެ. މި ޝޯވ ގެ ހަތަރުވަނަ ލިބިފައިވަނީ "ވީ އަންބީޓަބްލް" އަށެވެ.
މި ސީޒަންގެ ސުޕަރ ޖަޖެއްގެ ގޮތުގައި ރެމޯ ޑިސޫޒާ ހަރަކާތްތެރިވެފައިވާ އިރު ކެޕްޓަނުންގެ ގޮތުގައި ދަރުމާޝް ޔެލާންޑޭ، ޝަކްތީ މޯހަން، އަދި ޕުނީތު ޕާޓަކް ވަނީ ފެނިގެންގޮސްފައެވެ. ހޮވުނު ބައވެރިން ވަނީ މި ތިން ކެޕްޓަނުންގެ ދަށަށް ގެނެވިފައެވެ.
ހުނަރުވެރި، މޮޅު، ސިއްސުވާލާފަދަ އެތައް ހުށަހެޅުންތަކުން ބައިވެރިންގެ ފަރާތުން ވަނީ ފެނިގެންގޮސްފައެވެ. މި ސީޒަން ހުށަހަޅާދީފައިވަނީ ރާގަވް ޖުޔަލް އަދި ސުގަންދާ މިޝްރާއެވެ.