ތައިލެންޑް އިން އިންޑިއާ އަށް ދަތުރުކުރި ފަސިންޖަރެއްގެ ލަގެޖުން އެއް މަހުގެ ޅަ ލެޕާޑެއް ފެނުމުގެ ސަބަބުން އޭނާ އެއާޕޯޓްގައި މަޑުކުރުވައިފި އެވެ.
މީޑިއާ ރިޕޯޓްތައް ބުނާގޮތުން އެމީހާ އާއި ގުޅޭގޮތުން ޝައްކު އުފެދުނީ އޭނާގެ ދަބަހުން އަޑުތަކެއް އިވެން ފެށުމުންނެވެ. އެ ދަބަސް ބަލައިފާސްކުރުމުން އެއް ކިލޯގެ ކުޑަ ލެޕާޑެއް ބާޒާރު ކޮތަޅަކަށް ލާފައި ފޮރުވާފައި އޮއްވާ ވަނީ ފެނިފައެވެ.
ތައިލެންޑްގެ ބެންކޮކުން ދަތުރުކުރި އެމީހާ ޗެއްނާއި އެއާޕޯޓަށް އެތެރެވީ އިއްޔެ ހެނދުނުގެ ވަގުތެއްގަ އެވެ.
އޮފިޝަލުންނާއި ހަވާލާދީ "އޭއެފްޕީ" އިން ރިޕޯޓްކުރާ ގޮތުގައި އެމީހާ އަކީ ބައިނަލްއަޤްވާމީ ސްމަގްލިންގ ރިންގެއްގައި ހިމެނޭ މީހަކުތޯ ކަމާއިބެހޭ ފަރާތްތަކުން ދަނީ މިހާރު ތަޙުޤީޤު ކުރަމުންނެވެ.
އުމުރުން 45 އަހަރުގެ އެ މީހާގެ ނަން އަދި ހާމަކޮށްފައެއް ނުވެއެވެ. އޭނާގެ ލަގެޖާއި ބެހޭގޮތުން ކަސްޓަމްސްގެ އޮފިސަރުން ސުވާލުކުރުމުން އޭނާ ދިނީ ވަރަށް ނުސީދާ ޖަވާބުތަކެއް ކަމަށްވެސް މަޢުލޫމާތު ލިބެއެވެ.
އެއާޕޯޓް އޮފިޝަލުން ބުނާ ގޮތުގައި އެ ލެޕާޑް ފެނުނުއިރު އޮތީ ވަރަށް ނާޒުކު ޙާލަތެއްގައި ކަމަށެވެ. އެއާޕޯޓްގައި ނަގާފައިވާ ފޮޓޯތަކުން އޮފިޝަލުން އެ ލެޕާޑަށް ފުޅިން ކިރުދޭ މަންޒަރު ފެނެއެވެ.
ވެޓެރިނޭރިއަންސް އެ ލެޕާޑް ބެލުމަށްފަހު، މިހާރު އެ ކުޑަ ލެޕާޑް ވަނީ ޗެއްނާއިގެ އަރިގްނަރް އައްނާ ޒޯލޮޖިކަލް ޕާކަށް ގެންގޮސްފަ އެވެ.