އިރުމަތީ އިންޑިއާގެ ސްޓޭޓެއް ކަމުގައިވާ ބިހާރްގައި ހިނގި ރޭލު އެކްސިޑެންޓެއްގައި މަދުވެގެން ހަތް ފަސިންޖަރުން މަރުވެ، އިތުރު އެތައް ބަޔަކަށް އަނިޔާވެއްޖެ އެވެ.
މިއަދު ހެނދުނު ޕަޓްނާ އިން ގަޑިއަކު 55 ކިލޯމީޓަރުގެ ބާރުމިނުގައި ދަތުރުކުރަމުން އައި އެ ރޭލު އެކްސިޑެންޓްވިއިރު، ގިނަ ފަސިންޖަރުން ތިބީ ނިދާފައެވެ.
އިންޑިއަން ރޭލްވޭސް އިން ނެރުނު ބަޔާނެއްގައި ބުނެފައި ވަނީ އެ އެކްސިޑެންޓް ދިމާވާން މެދުވެރިވި ސަބަބަކީ ރޭލު ފްރެކްޗަރ ވުމުން ކަމަށެވެ.
މި ހާދިސާގައި މަރުވި ކޮންމެ މީހެއްގެ އާއިލާއަށް 500،000 ރުޕީސްގެ ފައިސާގެ ބަދަލެއް ދިނުމަށް ވަނީ ނިންމާފައެވެ.
އިންޑިއާގައި ރޭލު އެކްސިޑެންޓްތައް ހިނގުމަކީ ވަރަށް އާންމު ކަމެކެވެ. އެކަމާއި ގުޅިގެން ރޭލްވޭސް މިނިސްޓަރ ޕިޔޫޝް ގޯޔަލް ވިދާޅުވީ ރޭލު ދަތުރުފަތުރުގެ ރައްކާތެރިކަން އިތުރަށް ރަނގަޅު ކުރެވިފައިވާ ކަމަށެވެ.
މީގެ އެތައް އަހަރުތަކެއް ކުރިން ބިނާކޮށްފައިވާ އިންޑިއާގެ ރޭލްވޭތަކުގެ ބޭނުން ގާތްގަނޑަކަށް 23 މިލިއަން ފަސިންޖަރުން ކުރެއެވެ.
ރޭލްވޭ ނެޓްވޯކް އިތުރަށް ރަނގަޅުކޮށް، ޒަމާނީ ފެންވަރަށް ތަރައްޤީ ކުރުމަށްޓަކައި ގާތްގަނޑަކަށް 137 ބިލިއަން ޑޮލަރު ޚަރަދު ކުރުމަށް އިންޑިއާގެ ސަރުކާރުން ވަނީ ވައުދުވެފައެވެ.
2012 ވަނަ އަހަރު އިންޑިއާގެ ސަރުކާރުން ނެރުނު ރިޕޯޓެއްގައި ބުނެފައިވާ ގޮތުން އަހަރު 15،000 މީހުން ރޭލު އެކްސިޑެންޓްތަކުގައި މަރުވެއެވެ.