ބޮޑު ބަޖެޓް ފިލްމްތައް ލީކުވުމަކީ މިފަހަކަށް އައިސް ވަރަށް އާންމު ކަމެކެވެ. އެންމެ ފަހުން ލީކުކޮށްލާފައި ވަނީ ކަންގަނާ ރަނައުތުގެ "މަނިކަރްނިކާ: ދަ ކުއީން އޮފް ޖާންސީ" އެވެ. މިހާރު ރިޕޯޓްތައް ބުނާގޮތުން އަނިލް ކަޕޫރް އާއި ސޯނަމް ކަޕޫރްގެ ފިލްމް "އޭކް ލަޅްކީ ކޯ ދޭކާ ތޯ އޭސާ ލަގާ" ވެސް ވަނީ އޮންލައިން ޕައިރެސީ ސައިޓެއްގައި ލީކުކޮށްލާފައެވެ.
މި ފިލްމަކީ އަނިލް އާއި ސޯނަމް އެކުގައި ކުޅުނު އެންމެ ފުރަތަމަ ފިލްމެވެ.
ޕައިރެސީ ވެބްސައިޓް (ޓެމިލްރޮކާސް) އާއި ދެކޮޅަށް ހަރުކަށި ފިޔަވަޅުތައް އަޅާފާއިވާއިރު، އެ ވެބްސައިޓުން ދަނީ އަދިވެސް ބޮޑު ބަޖެޓް ފިލްމްތަކުގެ ވަގު ކޮޕީތައް ލީކުކުރަމުންނެވެ. އެ ވެބްސައިޓުން ވަނީ ބޮލީވުޑް ފިލްމްތަކުގެ އިތުރުން ދެކުނު އިންޑިއާގެ ފިލްމްތައް ވެސް ލީކުކޮށްފައެވެ.
ސޯނަމް އާއި އަނިލްގެ އިތުރުން ރާޖްކުމާރް ރާއޯ އަދި ޖޫހީ ޗާވްލާ ވެސް ފެނިގެންދާ "އޭކް ލަޅްކީ ކޯ ދޭކާ ތޯ އޭސާ ލަގާ" ރިލީޒްކޮށްފައި ވަނީ މިދިޔަ ހުކުރު ދުވަހު އެވެ.
ޝެލީ ޗޯޕްރާ ދަރް ޑައިރެކްޓްކޮށް، ވިދޫ ވިނޯދު ޗޯޕްރާ ޕްރޮޑިއުސްކޮށްފައިވާ މި ފިލްމްގެ ޓައިޓަލް ބިނާކޮށްފައި ވަނީ އަނިލްގެ ފިލްމް "1942: އަ ލަވް ސްޓޯރީ" ގެ ހިޓް ލަވަ "އޭކް ލަޅްކީ ކޯ ދޭކާ ތޯ އޭސާ ލަގާ" ގެ މައްޗަށެވެ.