ރައީސް އިބްރާހިމް މުހައްމަދު ސޯލިހު އަވަށްޓެރި ސްރީލަންކާ އަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި، އެމަނިކުފާނަށް އެޤައުމުގެ ސަރުކާރުން ވިދާޅުވި ހޫނު މަރުޙަބާ އަށް ޝުކުރު ދަންނަވައިފި އެވެ.
ރައީސް، ލަންކާ ސަރުކާރަށް ޝުކުރު ދަންނަވާފައި ވަނީ މިއަދު ކުރެއްވި ޓްވީޓެއްގަ އެވެ.
Very happy to be here in Sri Lanka on my first State Visit to this beautiful country. I thank the Sri Lankan government for the warm welcome accorded to me and my delegation. I am confident my visit will further strengthen the cordial relations between our two countries.
— Ibrahim Mohamed Solih (@ibusolih) February 3, 2019
އެ ޓްވީޓްގައި ރައީސް ވިދާޅުވެފައި ވަނީ ފުރަތަމަ ރަސްމީ ދަތުރުފުޅުގައި ލަންކާ އަށް ވަޑައިގެންނެވުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށެވެ. އަދި ރައީސް ވަނީ އެމަނިކުފާނާއި، އެމަނިކުފާނާއެކު ލަންކާ އަށް ވަޑައިގެންނެވި ރާއްޖޭގެ ވަފްދަށް ލަންކާ ސަރުކާރުން ދެންނެވި ހޫނު މަރުޙަބާ އަށް ޝުކުރު އަދާކުރައްވާފައެވެ.
މީގެ އިތުރުން، މި ދަތުރުފުޅުގެ ސަބަބުން ލަންކާ އާއި ދިވެހިރާއްޖެ އާއި ދެމެދު އޮންނަ ރަހުމަތްތެރިކަމުގެ ގާތް ގުޅުން އިތުރަށް ވަރުގަދަވެގެންދާނެ ކަމަށް ޔަޤީންކުރައްވާ ކަމަށްވެސް ރައީސް ވިދާޅުވި އެވެ.
ރައީސް ލަންކާއަށް ވަޑައިގެންނެވީ އެޤައުމުގެ މިނިވަން ދުވަހާ ގުޅިގެން ބާއްވާ ޚާއްސަ ހަރަކާތްތަކުގައި ބޮޑުވަޒީރު ރަނިލް ވިކްރަމަސިންހް ގެ ދައުވަތަކަށެވެ. ރައީސް ސޯލިހަށް ލަންކާއިން މަރުހަބާ ދެންނެވީ ވެސް ބޮޑުވަޒީރު ރަނިލްއެވެ.
ރައީސް ސޯލިހު މާދަމާ، ރަނިލް ދެއްވާ ޚާއްސަ ފަރިކޮޅެއްގައި ވެސް ބައިވެރިވެވަޑައިގެންނެވުމަށް ވަނީ ހަމަޖެހިފައެވެ.