އަރްބާޒް ޚާން އުފައްދާ ދަބަންގް ސިލްސިލާގެ 3ވަނަ ފިލްމް ކަމަށްވާ "ދަބަންގް 3" ގައި ކަރީނާ ކަޕޫރު ޚާން ހާއްސަ ލަވައަކުން ފެނިގެންދާނެ ކަމަށް ބެލެވޭކަމަށް އިންޑިއާގެ ބައެއް ނޫސްތަކުން ރިޕޯޓްކޮށްފައިވެއެވެ.
މީގެ ކުރިން ވެސް ދަބަންގް ފިލްމެއްގައި މަޝްހޫރު ވެގެންދިޔަ "ފެވިކޯލް" ލަވައިން ކަރީނާ ވަނީ ފެނިގެން ގޮސްފައެވެ.
އަރްބާޒް ޚާންގެ ފިލްމުތަކުގައި އޭނާގެ ކުރީގެ އަނބިމީހާ މަލައިކާ އަރޯރާ އައިޓަމް ސޯންގްތަކުން ފެނިގެން ގޮސްފައިވާ އިރު މި ފަހަރު ފިލްމުގައި އޭނާ ފެންނާނެ ކަމަށް ނުބެލެވޭ ކަމަށް ގިނަ ފަރާތްތަކުން ބުނެއެވެ.
ލީޑް ރޯލުން ސަލްމާން ޚާން އަދި ސޮނާކްޝީ ސިންހާ ފެނިގެންދާ މި ފިލްމުގެ ޝޫޓިންގ މާރޗްމަހު ފެށުމަށް ހަމަޖެހިފައިވާ ކަމަށް އަރުބާޒް ޚާން ބުނެއެވެ.
އަރްބާޒް ބުނެފައިވަނީ މި ފިލްމު މިއަހަރު ރިލީޒް ކުރެވޭނެ ކަމަށް ބެލެވިފައިވީ ނަމަވެސް ސަލްމާން ބާރަތު ފިލްމުގެ މަސައްކަތުގައި އަވަދިނެތި އުޅުމުގެ ސަބަބުން އެގޮތަށް ކުރިޔަށް ގެންދެވޭނެ ކަމަށް މިހާރު ނުބެލެވޭ ކަމަށެވެ.
މި ފިލްމުގެ ޕްރޮޑިއުސަރަކީ އަރްބާޒް ޚާން އެވެ. އަދި ޑައިރެކްޓަރަކީ މަޝްހޫރު ކޮރިއޮގްރާފަރ ޕްރަބޫ ދޭވާއެވެ.