އަވަށްޓެރި ސްރީ ލަންކާގެ އެއާޕޯޓެއްގައި ޑްރޯން އަރުވައިގެން ހައްޔަރުކުރި ހަތަރު ދިވެހިން ދޫކޮށްލައިފި އެވެ.
އެ މައްސަލާގައި ހައްޔަރުކޮށްފައިވަނީ 19 އަހަރާއި 23 އަހަރާއި ދެމެދުގެ ތިން ފިރިހެނުންނާއި އެއް އަންހެނެކެވެ. އެމީހުން ނިގަމްބޯ މެޖިސްޓްރޭޓް ކޯޓަށް ހާޒިރުކޮށްފައި ވަނީ ރޭގެ ވަގުތެއްގަ އެވެ. ނަމަވެސް އެ މީހުންގެ މައްޗައް ދައުވާ ނުކޮށް އެ މީހުން މިނިވަންކުރުމަށް ކޯޓުން ވަނީ ނިންމާފައެވެ.
ރާއްޖޭގައި ފަސޭހައިން ޑްރޯން އެރުވުނަސް ލަންކާ ގާނޫނުގައި ރަޖިސްޓާ ނުކޮށް ޑްރޯން އެރުވުމަކީ މަނާ ކަމެކެވެ. 200 ގުރާމަށް ވުރެ ބަރު ޑްރޯނެއް ލަންކާގައި އެރުވޭނީ އެގައުމުގެ ސިވިލް އޭވިއޭޝަން އޮތޯރިޓީގައި ރަޖިސްޓްރީ ކުރުމަށް ފަހުއެވެ.
ފުލުހުން ބުނި ގޮތުގައި އެމީހުން ލަންކާގެ ބަންޑާރަނަޔަކަ އިންޓަނޭޝަނަލް އެއާޕޯޓު (ބީއައިއޭ) ވީޑިއޯ ކުރުމަށް ޑްރޯން އަރުވާފައިވަނީ ޑްރޯން އެރުވުމުން މަނާ ސަރަހައްދެއްގައި ކަމަށެވެ.