ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ ނެޝަނަލް ޕްރިވެންޓިވް މެކޭނިޒަމް (އެންޕީއެމް) އިން ކ. ތިލަފުށީގައި ހުންނަ ތިލަފުށި އަހުލުވެރި މަރުކަޒަށް މިއަދު ޒިޔާރަތްކޮށްފި އެވެ.
އެޗްއާރްސީއެމް އިން ބުނީ އެ ޒިޔާރަތުގެ މައިގަނޑު މަޤްސަދަކީ ތިލަފުށި އަހުލުވެރި މަރުކަޒުގައި ތިބޭ ޤައިދީންނާމެދު ޢަމަލުކުރެވޭ ގޮތާއި، އެއްވެސް އަނިޔާވެރި، ލާއިންސާނީ ނުވަތަ ދަށުދަރަޖައިގެ ޢަމަލެއް ހިނގާތޯ ބެލުމާއި، އެ މަރުކަޒުގައި ތިބޭ ޤައިދީންނަށް ލިބިދޭންޖެހޭ ޙައްޤުތައް ކަށަވަރު ކުރެވިފައިވާ މިންވަރު ދެނެގަތުމާއި، މަރުކަޒުގައި މަސައްކަތްކުރާ މުވައްޒަފުންގެ ޙާލަތު ދެނެގަތުމާއި، މުވައްޒަފުންނަށް މަސައްކަތް ކުރުމަށް ދިމާވާ ދަތިތައް ދެނެގަތުމުގެ އިތުރުން މަރުކަޒުގެ އާންމު ޙާލަތު ދެނެގަތުން ކަމަށެވެ.
އަދި އެ ޒިޔާރަތަށްފަހު އެ ކޮމިޝަނަށް ފާހަގަކުރެވުނު ކަންތައްތައް ހިމެނޭ އަވަސް ކަރުދާހެއް، މިއަދުން ފެށިގެން ތިން ދުވަހުގެ ތެރޭގައި އެ މަރުކަޒާއި ހިއްސާކޮށް، އެ ޒިޔާރަތުގެ މައްޗަށް ބިނާކޮށް ރިޕޯޓެއް ތައްޔާރުކޮށް، ތިލަފުށި އަހުލުވެރި މަރުކަޒާއި މޯލްޑިވްސް ކަރެކްޝަނަލް ސަރވިސް އަދި ކަމާގުޅޭ އެހެނިހެން އިދާރާތަކާއި ހިއްސާކުރުމަށްފަހު، ރިޕޯޓްގައި ފާހަގަކޮށޤފައިވާ ކަންކަމާއި ހުށަހަޅާފައި ހުށަހެޅުންތަކާއި ގުޅޭގޮތުން މަޝްވަރާކުރުމަށް ކަރެކްޝަންސް އާއެކު ބައްދަލުވުމެއް ބާއްވާނެ ކަމަށްވެސް އެޗްއާރްސީއެމް އިން ބުނެއެވެ.
މީގެ އިތުރުން، އެ ރިޕޯޓްގައި ފާހަގަކޮށްފައިވާ ކަންކަމާއި، އިސްލާހުކުރުމަށް ހުށަހަޅާފައިވާ ހުށަހެޅުންތަކާއި ގުޅޭގޮތުން، އެ ރިޕޯޓްގެ ހުށަހެޅުންތައް ތަންފީޒްވަމުންދާ މިންވަރު ދެނެގަތުމަށް ލިޔުމުން އަހަރަކު ދެ ފަހަރު ފޮލޯއަޕް ހަދަމުން ދާނެ ކަމަށްވެސް އެޗްއާރްސީއެމް އިން ބުނެއެވެ.