މާވެލް ސިނަމެޓިކް ޔުނިވާސްގެ ދެން އެންމެ އަވަހަށް ނިކުންނަން ތައްޔާރުވެފައިވާ ފިލްމު ކެޕްޓަން މާވެލްގެ އާ ޓީޒާ އެއް ދައްކާލިއިރު ނިކް ފިއުރީގެ ބައި ކުޅޭ ސެމުއެލް އެލް. ޖެކްސަން އަދި ނެގެޓިވް ރޯލުގައި ޔޮން-ރޮގް ގެ ކެރެކްޓާގައި ފެނިގެންދާ ޖޫޑް ލޯ އާ ކެރޯލް ޑޭންވާސް އާއި ދެމެދު ހިނގާ ކަންތައްތަކުގައި އޭނާގެ ކުޅަދާނަކަމާއި ހައިބަތު ފެނިގެންދެއެވެ.
މި ޓީޒާ ދައްކާލާފައިވަނީ 2019 ވަނަ އަހަރުގެ ސުޕަ ބޯލްގައި ލޮސް އެންޖެލެސް ރޭމްސް އާ ނިއު އިންގްލެންޑް ޕެޓްރިއަޓްސް ބައްދަލުކުރި މެޗުގެ ތެރެއިންނެވެ. 30 ސިކުންތުގެ ފޯރިގަދަ މި ޓްރެއިލާގައި މުޅިން އާ މައުލޫމާތާއި މަންޒަރުތަކެއް ފެނިގެންގޮސްގައިނުވުމަކީ ކުރިއަށް އޮތް މަހެއްހާ ދުވަހުގެ ތެރޭގައި ރިލީޒްކުރުމަށް ހަމަޖެހިފައިވާ މި ފިލްމާއި މެދު ހައިރާންވާންޖެހޭނެފަދަ ކަމެއް ނޫނެވެ.
މި ފިލްމުގައި މާވެލް ސިނަމެޓިކް ޔުނިވާސްގައި ފުރަތަމަ ފަހަރަށް ކެރޯލް ޑޭންވާސް ފެނިގެންދާއިރު މާވެލްގެ ދެން ކުރިއަށް އޮތް ފިލްމުކަމަށްވާ އެވެންޖާސް: އެންޑްގޭމް ގައި ވެސް ޑޭންވާސްގެ ކެރެކްޓާ ފެނިގެންދާނެއެވެ. އެހެންނަމަވެސް، ކެޕްޓަން މާވެލްގެ ޓްރެއިލާތަކުގެ ސަބަބުން އެވެންޖާސްގައި އޭނާގެ ރޯލާއި ގުޅޭ މާ ގިނަ ކަންތައްތަކެއް އާއްމުންނަށް މިހާތަނަށް ހާމަކޮށްފައިނުވާއިރު ބެލެވޭގޮތުގައި މި ފިލްމާއި ގުޅޭ ގިނަ މައުލޫމާތުތައް އެނގިގެންދާނީ މި އަހަރުގެ އޭޕްރީލް މަހުގެ 27 ވަނަ ދުވަހު އެވެންޖާސް: އެންޑްގޭމް ރިލީޒްކުރުމުންނެވެ.
ގިނަ ބަޔަކު މިހާރު ބެލުމަށް ކެތްމަދުވެފައިވާ ފިލްމު، ކެޕްޓަން މާވެލް ރިލީޒްކުރުމަށް ހަމަޖެހިފައިވަނީ ކުރިއަށް އޮތް މާރިޗް މަހުގެ 8 ވަނަ ދުވަހުގައެވެ.