ފިލްމް" ގެސްޓް އިން ލަންޑަން"، "ސޯނޫ ކޭ ޓީޓޫ ކީ ސުވީޓީ" ފަދަ ފިލްމުތަކުން ބެލުންތެރިންނަށް ފެނިގެންގޮސްފައިވާ ޒުވާން އެކްޓަރު ކާރްތިކް އާރްޔަން މިހާރު ކުޅުމަށް ތައްޔާރުވާ ފިލްމް ކަމަށްވާ "ޕަތީ ޕަތުނީ އޮއުރް ވޯ" ގައި އޭނާ ފެނިގެން ދާނީ ތަފާތު ގޮތަކަށް ކަމަށް ފިލްމުގެ ޕްރޮޑިއުސަރު ޖޫނޯ ޗޯޕުޅާ ބުނެފިއެވެ.
"ޕަތީ ޕަތުނީ އޮއުރް ވޯ" އަކީ 1978 ވަނަ އަހަރު މި ނަމުގައި ބީއާރު ޗޯޕުޅާ ނެރެފައިވާ ފިލްމުގެ ނަކަލެކެވެ. މި ފިލްމުގައި ކާރްތިކް ފެނިގެންދާނީ ވަރަށް ހަރުދަނާ މީހެއްގެ ރޯލުން ކަމަށާއި އދި އެ ރޯލު ބެލުންތެރިންނަށް ވަރަށް ކަމުދާނެ ކަމަށް ވެސް ޕްރޮޑިއުސަރު ބުނެއެވެ.
ބީއާރު ސްޓޫޑިއޯގެ ޕްރޮޑިއުސަރު ޖޫނޯ ޗޯޕުޅާ ބުނެފައިވާ ގޮތުގައި އެ ފިލްމުގައި ކާރްތިކް ފެނިގެންދާނީ އަލަށް ކައިވެންޏެއް ކޮށްގެން އުޅޭ މީހެއްގެ ރޯލުން ކަމަށާއި އެހެން ކަމުން އޭނާގެ ކެރެކްޓާއަށް ވަރަށް ބޮޑެތި ބަދަލުތައް ގެންނަން ޖެހެއެވެ. އަދި ރޯލު އެންމެ ފުރިހަމައަށް އަދާކުރުމަށްޓަކާ ކޮންމެފަދަ ގުރުބާނީއެއް ވާންވެސް ތައްޔާރަށް ކާރްތިކް ހުރިކަމަށް އޭނާ ވަނީ ބުނެފައެވެ.
މި ފިލްމުގައި ކާރްތިކްގެ ލުކް ސްޓައިލްޑް ކޮށްފައިވަނީ ޑިޒައިނަރ ނިހާރިކާ ޚާންގެ އިތުރުން ހެއަރ ސްޓައިލިސްޓް ހާކިމް އާލިމްއެވެ.
މުދައްސަރު އަޒިޒް ޑައިރެކްޓްކުރާ މި ފިލްމުގައި ކާރްތިކްގެ އިތުރުން އަންހެން ލީޑް ރޯލުން ފެނިގެންދާނީ ބޫމީ ޕެޓްނޭކަރު އަދި އަނަންޔާ ޕާންޑޭއެވެ.
މި ފިލްމުގެ ޕްރޮޑިއުސަރުންގެ ތެރޭގައި ކްރިޝަން ކުމާރު، ރޭނޫ ރަވީ ޗޯޕުޅާ، އަދި އަބޭ ޗޯޕުޅާ ހިމެނެއެވެ.