ވަޒީފާގެ ބިރު ދެއްކުމަށް އަދިވެސް ނިމުމެއް އައިސްފައިނުވާ ކަމަށް މަސައްކަތްތެރިންގެ ހައްގުގައި ވަކާލާތުކުރާ މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީ(އެމްއެލްއެސްޑީޕީ) އިން ބުނެފިއެވެ.
ލޭބާ ޕާޓީން ނެރުނު ބަޔާނެއްގައި ބުނެފައިވަނީ މިހާރުވެސް ވަޒީފާގެ ބިރު ދައްކައި ފިޔަވަޅު އަޅާނެ ކަމުގެ އިންޒާރުތައް ލިބެމުން އަންނަ ކަމުގެ ޝަކުވާ އެޕާޓީއަށް ލިބެމުން އަންނަ ކަމަށެވެ. އަދި ސިޔާސީ ބޭނުމުގައި އެފަދަ ފިޔަވަޅުތައް އެޅެމުން އަންނަ ކަން ފާހަގަކުރެވިފައިވާ ކަމަށް އެ ބަޔާނުގައި ބުނެފައިވެއެވެ.
ސިޔާސީ ގޮތުން މަންފާއެއް ހޯދުމަށް ނުވަތަ މީހަކަށް ދެރައެއް ދިނުމަށް ވަޒީފާގެ ބިރުދައްކައި، ފިޔަވަޅު އެޅުން އަދި ވަޒީފާއިން ވަކިކުރުމަކީ ބަލައިގަނެވޭނެ ކަމެއް ނޫން ކަމަށް ވެސް އެޕާޓީން ބުނެފައިވެއެވެ.
އެފަދަ ގެއްލުމެއް ލިބޭ ފަރާތަކަށް ލޭބާ ޕާޓީން ވަނީ އެހީތެރިކަން ފޯރުކޮށްދޭނެ ކަމަށް ބުނެފައެވެ. އެއީ ސިޔާސީ ގޮތުން ވިޔަސް ނުވަތަ ގާނޫނީ އެހީތެރިކަމެއް ލަފަޔެއް ވިޔަސް ލޭބާ ޕާޓީން ފޯރުކޮށްދޭނެ ކަމަށް ވެސް މެއެވެ.
ރައީސް އިބްރާހިމް މުހައްމަދު ސޯލިހްގެ ކެމްޕޭނުގައި އެމަނިކުފާނު ވަނީ ސިޔާސީ ގޮތުން ވަޒީފާގެ ބިރު ދެއްކުން ނައްތާލުމަށް ވައުދުވެވަޑައިގެންފައެވެ.