އަބީޝެކް ބައްޗަން އަދި އޭނާގެ އަނބިމީހާ މަޝްހޫރު ތަރި އައިޝްވަރްޔާ ރާއީ ބައްޗަން އަހަރު ތަކަކަށްފަހު އެކުގައި ފިލްމަކުން ފެންނަން ތައްޔާރުވާ ކަމަށް ރިޕޯޓްތައް ބުނެފިއެވެ.
އެންމެ ފަހުން މި ދެތަރިން އެކުގައި ފެނިފައިވަނީ 2010 ވަނަ އަހަރު މަނީރަތްނަމްގެ ފިލްމެއް ކަމަށްވާ "ރާވަން" އިންނެވެ. އެއަށްފަހު މިހާރު މި ދެމަފިރިން ވަނީ އަނޫރާގް ކަޝްޔަޕް އުފައްދަން ތައްޔާރުވާ ފިލްމް "ގުލާބު ޖާމޫން" އަށް ތައްޔާރުވާން ފަށާފައެވެ.
ފަހުގެ ބައެއް ރިޕޯޓްތައް ބުނާގޮތުގައި މި ފިލްމާއިބެހޭ ގޮތުން ތަފާތު ހަފްލާތަކުގައި މި ދެތަރިން ވަނީ ވާހަކަ ދައްކާފައެވެ. މި ދެތަރިން އެކުގައި ލޯބިވެރިންގެ މަންޒަރު ދައްކުވައިދޭ ފިލްމު ނުކުޅޭ ގޮތަށް ނިންމާފައިވާ ކަމަށާއި ސަބަބަކީ ދެމީހުންގެ ލޯބީގެ މަންޒަރުތައް ބެލުންތެރިންނަށް މިހާރު އެހާ ގަޔާނުވެދާނެތީ ކަމަށް ވެސް ބައެއް ރިޕޯޓްތައް ބުނެއެވެ.
އަބީޝެކް އަދި އައިޝްވަރްޔާ ވަނީ އެކުގައި ބައެއް ފިލްމްތައް ކުޅެފައެވެ. އޭގެ ތެރޭގައި "ދާއި އަކްޝަރް ޕްރޭމް ކޭ"، "ކުޗް ނާ ކަހޯ" އަދި "ގުރޫ" ހިމެނެއެވެ.
މިވަގުތު މި ތަރިންގެ މަސައްކަތަށް ބަލާއިރު އަބީޝެކް އެންމެ ފަހުން ފެނިފައިވަނީ އަނޫރާގް ކަޝްޔަޕްގެ ފިލްމް "މަންމަރްޒިޔާން"އިންނެވެ. އެ ފިލްމުގައި އޭނާއާއެކު ވިކީ ކޯޝަލް އަދި ތާޕްސީ ޕަންނޫ ވަނީ ފެނިގެން ގޮސްފައެވެ.
އައިޝްވަރްޔާ އެންމެ ފަހުން ފެނިފައިވަނީ އަނިލް ކަޕޫރު އަދި ރާޖް ކުމާރް ރާއޯ އާއެކު ފިލްމް' ފަންނޭ ޚާން" އިންނެވެ.