ކުރީގެ ރައީސް މައުމޫން އަބްދުލްޤައްޔޫމަށް ޕީޕީއެމް އަނބުރާ ހަވާލުކުރުމަށް އެދި ސިވިލް ކޯޓަށް ހުށައެޅި މައްސަލަ ސުޕްރީމް ކޯޓުން ބާތިލުކޮށްފިއެވެ.
ސިވިލް ކޯޓުގައި އާންމުންގެ ދެ މީހަކު ހުށައެޅި މައްސަލަ ސުޕްރީމް ކޯޓުން ބާތިލުކޮށްފައިވަނީ މައްސަލަ ސިވިލް ކޯޓުގައި ކުރިއަށް ދަނިކޮށް ސުޕްރީމް ކޯޓުން މައްސަލަ ނެގުމަށް ފަހުގައެވެ.
ކުރީގެ ރައީސް ޔާމީންގެ ވެރިކަމުގެ ދައުރު ހަމަވެ މުސްތަޝާރުގެ މަގާމު ހުސްވުމުން، ޕީޕީއެމް އަނބުރާ ރައީސް މައުމޫނާ ހަވާލުކުރުމަށް އެދި ކޯޓަށް މައްސަލަ ހުށައެޅީ ލ. ގަން، ތުނޑި، އަލީ އަހުމަދެވެ.
އަދި ރިޔާސީ އިންތިޚާބަށް ފަހު ޕީޕީއެމުން ބޭއްވި ކޮންގްރެސް ސައްޚަ ނޫން ކަމަށް ބުނެ އިލެކްޝަންސް ކޮމިޝަނުން އެ ކޮންގްރެސް ގަބޫލު ނުކުރުމުން، ޕީޕިއެމް މައުމޫނާއި ހަވާލުކުރުމަށް މައްސަލަ ކޯޓަށް ވެއްދީ ގދ. ތިނަދޫ ބީޗް ރެސްޓް، އަހުމަދު ރަޝީދެވެ.
ޕީޕިއެމް ކޮންގްރެސް ސައްހަ ކަމަށް ކަނޑައެޅުމުން އެންމެ ފަހުން އިލެކްޝަންސް ކޮމިޝަނުން ކޮންގްރެސް ގަބޫލުކޮށްފައިވާއިރު މައްސަލަ ނިމުނީވެސް ކުރީގެ ރައީސް ޔާމީނާ އެއްކޮޅަށެވެ.
އޭގެ ސަބަބުން މައުމޫން ވަނީ މޯލްޑިވްސް ރިފޯމް މޫވްމަންޓުގެ ނަމުގައި ޕާޓީއެއް ރަޖިސްޓާ ކުރުމަށް ވެސް ހުށައަޅާފައެވެ.