ހޮސްޕިޓާލިޓީ ދާއިރާއަށް މީހުން ތަމްރީން ކުރުމަށްޓަކައި ޔުނިވާސަލް ފައުންޑޭޝަން އާއެކު ވިލާ ކޮލެޖުން އެއްބަސްވުމެއްގައި ސޮއިކޮށްފި އެވެ.
އިއްޔެ އެކަމަށްޓަކައި ބޭއްވި ރަސްމިއްޔާތުގައި އެއްބަސްވުމުގައި ވިލާ ކޮލެޖުގެ ފަރާތުން ސޮއިކުރެއްވީ ކޮލެޖުގެ ރެކްޓަރ ޑރ. އަހުމަދު އަންވަރެވެ. އަދި ޔުނިވާސަލް ފައުންޑޭޝަންގެ ފަރާތުން ސޮއިކުރެއްވީ އެ ތަނުގެ ރައީސް އިޔާޒް ވަހީދެވެ.
ހޮސްޕިޓާލިޓީ ދާއިރާއިން ސެޓްފިކެޓް 3ގެ ފެންވަރަށް ތަމްރީންކޮށްދޭ މި ޕްރޮގްރާމް ސްޕޮންސަރ ކޮށްފައި ވަނީ ޔުނިވާސަލް ފައުންޑޭޝަނުންނެވެ.
މި ކޯހުގެ ދަށުން ފުޑް އެންޑް ބެވަރެޖް ސާވިސަސް، ހައުސް ކީޕިން، އަދި ޕްރަންޓް އޮފީސް ފަދަ ދާއިރާތަކުން ތަމްރީން ދެވޭނެއެވެ. އަދި ވިލާ ކޮލެޖުގައި ތިއަރީ ބައިތައް ފުރިހަމަކުރުމަށްފަހު، އަމަލީ ތަޖުރިބާ ފުރިހަމަ ކުރަންޖެހެނީ ޔުނިވާސަލްގެ ރިސޯޓްތަކުގައި ތިބެގެންނެވެ. އަދި ކޯސް ކުރިއަށްގެންދާ މުއްދަތުގައި ބައިވެރިންނަށް މަހަކު 3،000 ރުފިޔާގެ އެލަވަންސެއް ވެސް ލިބޭނެ އެވެ.
މިއީ މި ޕްރޮގްރާމް ހިންގާ ތިންވަނަ ފަހަރު ކަމުގައިވާއިރު، މިހާތަނަށް މި ޕްރޮގްރާމްގެ ދަށުން 40 އަށްވުރެ ގިނަ ދަރިވަރުން ވަނީ ތަމްރީންކޮށްފަ އެވެ.
މި ޕްރޮގްރާމްގެ ކިޔެވުން އަންނަ ޖޫން މަހުގެ ތެރޭގައި ފެށުމަށް ނިންމާފައިވާއިރު، ޕްރޮގްރާމްގައި ބައިވެރިވުމުގެ ފުރުސަތު އިއްޔެއިން ފެށިގެން އަންނަ މާޗު މަހުގެ ނިޔަލަށް ވަނީ ހުޅުވާލާފައެވެ.