ރ. މަޑުއްވަރީގެ ރައްޔިތުން 2016 ވަނަ އަހަރު ހިއުމަން ރައިޓްސް ކޮމިޝަނަށް ހުށައެޅި މައްސަލައެއް ބެލުމަށް ތިން އަހަރު ފަހުން، މިދިޔަ މަހު ކޮމިޝަނުން އެ ރަށަށް ޒިޔާރަތްކޮށްފިއެވެ.
މަޑުއްވަރީގައި އާންމުން ތިބޭ ސަރަހައްދުގައި ފައިބަރުގެ މަސައްކަތް ކުރާތީ 2016 ވަނަ އަހަރުގެ ޖެނުއަރީ 7 ވަނަ ދުވަހު އެރަށު ރައްޔިތުން ހުށައެޅި މައްސަލަ ބެލުމަށް ލޯކަލް ގަވަމެންޓް އޮތޯރިޓީއާއި ހެލްތް ޕްރޮޓެކްޝަން އޭޖެންސީއާއެކު އެޗްއާރްސީއެމުން އެ ރަށަށް ގޮސް މައްސަލަ ބަލާފައިވަނީ ހުސްވި ޖެނުއަރީ މަހުގެ 30 ވަނަ ދުވަހުގައެވެ.
ތިން އަހަރު ފަހުން ހިއުމަން ރައިޓްސް ކޮމިޝަނާއި އެޗްޕީއޭ އަދި އެލްޖީއޭގެ ޓީމަކުން މަޑުއްވަރިއަށް ގޮސް ފައިބަރުގެ މަސައްކަތް ކުރަމުންދާ ތަންތަން ބަލާފައިވެއެވެ. އަދި އެމީހުން އެ މަސައްކަތް ކުރަމުން ދަނީ ކައިރި ރައްޔިތުންގެ ރައްކާތެރިކަމަށް ބަލައި އެކަށީގެންވާ ފިޔަވަޅު އެޅުމަށް ފަހުގައި ތޯ ކޮމިޝަންތަކުން ބެލިކަމަށް އެޗްއާރްސީއެމުން ނެރުނު ބަޔާނެއްގައި ބުނެފައިވެއެވެ.
އާންމު ރައްޔިތުންގެ ޚިޔާލު އެކަމާ ގުޅިގެން ހޯދުމަށް ފަހު އިދާރާތަކުން ވަނީ މައްސަލަ ހައްލު ކުރުމަށް ރަށު ކައުންސިލާއި ސިއްހީ މަރުކަޒުގެ އިތުރުން ރަށުގެ އަންހެނުންގެ ކޮމިޓީއާއި ރަށުގައި ހަރަކާތްތެރިވާ ޖަމިއްޔާ ޖަމާއަތްތަކާއި ބައްދަލުކޮށް މަޝްވަރާ ކޮށްފައެވެ.
ނަމަވެސް އެކަންކަމުގެ ތަފްސީލެއް ކޮމިޝަނުން އާންމު ކޮށްފައެއް ނުވެއެވެ. އެހެން ނަމަވެސް ފާއިތުވެދިޔަ ދެ އަހަރު ތެރޭ އެކި ފަހަރު މަތިން މައްސަލަ ހައްލު ކުރުމަށް އެކި ގޮތްގޮތުން މުއާމަލާތް ކުރެވިފައިވާ ކަން ހާމަކޮށްފައިވެއެވެ.