ގޮނޑިތަކެއްގެ ވެރިފަރާތެއް ހޯދުމުގެ މަސައްކަތް ފުލުހުން ފަށައިފި އެވެ.
ފުލުހުން ބުނީ ވައްކަމުގެ މައްސަލައަކާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައިވާ ނުވަ ގޮނޑީގެ ވެރި ފަރާތެއް ހޯދަމުންދާ ކަމަށާއި، އެ ގޮނޑިތައް ފުލުހުންގެ ބެލުމުގެ ދަށަށް ގެނެސްފައިވަނީ ނިމިގެންދިޔަ ޖެނުއަރީ މަހުގެ 27 ވަނަ ދުވަހުގެ ވަގުތެއްގައި ކަމަށެވެ.
ނަމަވެސް އެ ގޮނޑިތައް ފުލުހުންގެ ބެލުމުގެ ދަށަށް ގެންގޮސްފައި ވަނީ ކޮން ރަށަކުން ކަމާއި، ވައްކަމުގެ ކޮން މައްސަލަކާއި ގުޅިގެން ކަމެެއް ފުލުހުން ހާމައެއް ނުކުރެއެވެ.
ފުލުހުން ބުނީ އެ ގޮނޑިތަކުގެ ވެރިފަރާތުން، ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓްގެ ޑިއުޓީ ނަންބަރު 9631696ށް ގުޅުއްވައި، ވެރިފަރާތްކަން އެނގޭނެ ލިޔުމަކާއެކު ޝަހީދު ޙުސައިން އާދަމް ބިލްޑިންގަށް ހާޒިރުވެ، ގޮނޑިތަކާ ހަވާލުވެލެއްވުމަށް އެދޭ ކަމަށެވެ.
އަދި މިފަދަ ކަންކަމުގައި ރައްޔިތުންގެ ފަރާތުން ފުލުހުންނަށް ލިބެމުންދާ އެއްބާރުލުން ފާހަގަކޮށް ޝުކުރުދަންނަވާ ކަމަށްވެސް ފުލުހުން ބުނެއެވެ.