ބޭންކް އޮފް މޯލްޑިވްސް(ބީއެމްއެލް)އިން 300،000 ރުފިޔާއާއި ހަމަޔަށް ލުއި ލޯނު ދޫކުރަން ނިންމައި އެކަން ވަރަށް އަވަހަށް ފަށާނެކަން މިއަދު އިއުލާން ކޮށްފި އެވެ.
އެ ބޭންކުން މިކަން އިއުލާން ކުރެއްވީ، ކްރެޑިޓް އިންފޮމޭޝަން ބިއުރޯގެ ވެބްސައިޓް އާންމުންނަށް ހުޅުވާލައި އަމިއްލައަށް ރިޕޯޓް ނެގޭނެ ހިދުމަތް އިފްތިތާހު ކުރުމަށް އެމްއެމްއޭއިން މިއަދު ހޮޓަލް ޖެންގައި ބޭއްވި ހަފްލާގައި ބީއެމްއެލްގެ ޑެޕިއުޓީ ޗީފް އެގްޒެކެޓިވް އޮފިސަރު މުހައްމަދު ޝަރީފްއެވެ.
ޝަރީފް ވިދާޅުވީ، ކްރިޑިޓް ބިއުރޯގެ މަސައްކަތް އެމްއެމްއޭއިން ފަށައިގެން ކުރިއަށް ގެންދާތާ އަށް އަހަރެއްހާ ދުވަސްވެފައިވާ އިރު އެ ބިއުރޯގެ މަސައްކަތުގެ ސަބަބުން ލޯނު ދޫކުރުމާއި ބޭންކުން ދޭ ހިދުމަތްތައް އަވަހަށް ބޮޑެތި ލުއިފަސޭހަތަކެއް ލިބިފައިވާ ކަމަށެވެ. އަދި ކްރިޑިޓް ބިއުރޯއަށް ފޯރުކޮށްދޭ މައުލޫމާތުގެ ބޮޑު ބައެއް ހިއްސާ ކުރަނީ ބީއެމްއެލްއިން ދޭ މައުލޫމާތުތައް ކަމަށް ވެސް ޝަރީފް ވިދާޅުވި އެވެ.
ކަސްޓަމަރުގެ ކްރެޑިޓް ރިޕޯޓް އޮންލައިންކޮށް އަމިއްލައަށް ނެގޭނެ އިންތިޒާމް ހަމަޖެހުމަކީ، ބޭންކުން ކަސްޓަމަރުންނަށް ދޫކުރާ ލޯނުގެ އަދަދު އިތުރުކުރެވޭނެ ކަމެއް ކަމަށް ޝަރީފް ވަނީ ވިދާޅުވެފައެވެ. އަދި ލޯނު ޕްރޮސެސް ކުރަން ދާ ވަގުތު ކުޑަކޮށްދޭނެ ކަމެއް ކަމަށާއި އެމްއެމްއޭއިން މިއަދު ތައާރަފްކުރި ހިދުމަތާ އެކު ބީއެމްއެލްއިން މިހާރު ދޫކުރާ ލުއި ލޯނުގެ އަދަދު އިތުރުކޮށް އަދި މުޅިންއާ ޕާސަނަލް ލޯނުތަކެއް ތައާރަފް ކުރުމަށް ނިންމާފައިވާކަމަށް އޭނާ ވިދާޅުވިއެވެ.
މިސާލެއްގެ ގޮތުން ބީ.އެމް.އެލް އިން ދޫކުރާ ލުއި ލޯނުގެ އިވަލުއޭޝަން އޮޓަމޭޓް ކުރެވި ލޯނު ހަމަޖެހޭ މުއްދަތު 5 ދުވަހަށް ކުޑަކުރެވިފައިވާކަން ވެސް ޝަރީފް ވަނީ ފާހަގަ ކުރައްވާފައެވެ.
"ކުރިން ބީއެމްއެލް އިން ދޫކުރާ 15 ހާހުގެ ލުއި ލޯނުތަކުގެ އަދަދު މިވަނީ އެއްލައްކަ އާ ހަމަޔަށް އިތުރު ކުރެވިފައި. އަދި ބީއެމްއެލް އިން މިހާރު މިދަނީ ލުއި ލޯނުގެ އަދަަދު ތިންލައްކަ އާއި ހަމަޔަށް އިތުރުކުރުމުގެ މަސައްކަތްކުރަމުން" ޝަރީފް ވިދާޅުވިއެވެ.
އަމިއްލަ ފަރުދުންނަށް އަމާޒުކޮށް އާ ލޯނުތަކެއް ތައާރަފްކުރުމުގެ މަސައްކަތްވެސް ކުރައްވަމުން ގެންދަވާ ކަމަށް ޝަރީފް ވަނީ ވިދާޅުވެފައެވެ. މިފަދަ ލޯނުތައް ހަމަ ޔަގީނުން ވެސް ބޭންކުތަކަށް ދޫކުރެވޭނީ ހަރުދަނާ ކްރެޑިޓް އިންފޮމޭޝަން ބިއުރޯއެއް ގާއިމުކުރެވިފައި އޮތުމުން ކަމަށް ޝަރީފް ވިދާޅުވި އެވެ.
އެ ބިއުރޯގެ ކަންތައް ތައް ރަނގަޅު ކޮށް ލިބޭ މަޢުލޫމާތުގެ ޞައްޙަކަން ކަށަވަރު ކުރުމަށްޓަކައި އެމް.އެމް.އޭ އާއި އަދި ބޭންކުތަކުން ވަރަށް ބުރަ މަސައްކަތް ކޮށްފައިވާކަން ޝަރީފް ފާހަގަ ކުރައްވާ އެއާއި އެއްކޮށް ބޭންކުތަކުން ދޭ ޚިދުމަތުގެ ފެންވަރު ވެސް ރަނގަޅު ކުރެވިފައިވާ ކަން އޭނާ ވަނީ ފާހަގަ ކުރައްވާފައެވެ.
ބީއެމްއެލްއިން އެންމެ ބޮޑުކޮށް މިހާރު ލުއި ލޯނު ދެނީ 100،000 ރުފިޔާއާ ހަމައަށެވެ.