ކުރިޔަށްއޮތް ރައްޔިތުންގެ މަޖިލިސް އިންތިހާބުގައި އެމްޑީޕީގެ ފަރާތުން ވާދަ ކުރައްވާ ކެނޑިޑޭޓުންގެ ފޯމްތައް އިލެކްޝަން ކޮމިޝަން(އީސީ)އަށް ހުށަހަޅައިފި އެވެ.
އެމްޑީޕީގެ ކެނޑިޑޭޓުންގެ ފޯމް އީސީއަށް ހުށަހެޅުއްވުމަށްޓަކާ ހުރިހާ ކެންޑިޑޭޓުން ވެސް ވަޑައިގެންނެވީ އެމްޑީޕީ އޮފީހުން ފެށިގެން އިލެކްޝަން ސެންޓަރު (ބާޖަމަލުއްދީން) އާއި ހަމަޔަށް ހިންގަވާފައެވެ.
ރައްޔިތުންގެ މަޖިލިސް އިންތިހާބަށް އެންމެ ފުރަތަމަ ކެނޑިޑޭޓުންގެ ފޯމް ހުށަހެޅި ޕާޓީއަކީވެސް އެމްޑީޕީ އެވެ. އެމްޑީޕީއިން 86 ދާއިރާއަށް ވާދަކުރެއެވެ. އެ ފޯމްތައް ވެސް އީސީއަށް ހުށަހަޅާފައިވަނީ ވަކި ވަކިންނެވެ.
އެމްޑީޕީއިން ހުށަހެޅި ފޯމްތަކާއި ހަވާލުވެފައިވަނީ އީސީގެ ނައިބް ރައީސް އަމްޖަދު މުސްތަފާ އެވެ.
އެންމެ ފުރަތަމަ ފޯމް ހުށަހެޅުއްވީ އެމްޑީޕީގެ ރައީސް މުހައްމަދު ނަޝީދެވެ. އެމަނިކުފާނު ވާދަ ކުރައްވަން ނިންމާފައިވަނީ މައްޗަންގޮޅި މެދު ދާއިރާ އަށެވެ.
ގާނޫނުގައިވާ ގޮތުން މަޖިލީހުގައި ވާދަ ކުރައްވާ ކެނޑިޑޭޓުންގެ ފޯމް އީސީއަށް ހުށަހަޅާތާ 48 ގަޑިއިރު ތެރޭގައި އެ ފޯމްގެ ސައްހަކަން ބަލައި އެފަރާތަށް އަންގަންޖެހޭނެ ކަމަށެވެ.
ރައްޔިތުންގެ މަޖިލިސް 2019ގެ އިންތިހާބު އޮންނާނީ އޭޕްރިލް މަހުގެ ހަވަނަ ދުވަހު އެވެ. މަޖިލިސް އިންތިހާބުގައި ވާދަކުރާ ކެނޑިޑޭޓުންްގެ ފޯމްތައް މިމަހުގެ 17 ވަނަ ދުވަހާ ހަމައަށް ހުށަހެޅުމަށް އީސީން ވަނީ ހުޅުވާލާފަ އެވެ.