ފަތުރުވެރިކަމުގެ ދާއިރާއިން ޚިދުމަތްދޭ ހުރިހާ ތަނެއް މާދަމާ އިން ފެށިގެން އިންސްޕެކްޓްކުރަން ފަށާނެ ކަމަށް ޓޫރިޒަމް މިނިސްޓްރީ އިން ބުނެފި އެވެ.
އެ މިނިސްޓްރީގެ ފަރާތުން މިއަދު ބޭއްވި ޕްރެސް ކޮންފަރެންސެއްގައި ވާހަކަފުޅުދައްކަވަމުން ޓޫރިޒަމް މިނިސްޓަރ އަލީ ވަހީދު ވިދާޅުވީ މި ހިނގާ ފެބްރުއަރީ މަހުގެ 07 ވަނަ ދުވަހުން ފެށިގެން އަންނަ ސެޕްޓެމްބަރ މަހުގެ 07 ވަނަ ދުވަހާއި ހަމައަށް އެފަދަ ތަންތަން އިންސްޕެކްޓް ކުރެވޭނެ ކަމަށާއި، އިންސްޕެކްޝަން ފަށާނީ ހއ. އަތޮޅުން ކަމަށެވެ.
މިނިސްޓަރ ވިދާޅުވީ މި އިންސްޕެކްޝަން ކުރިއަށްގެންދިއުމުގެ މަޤްސަދަކީ ރާއްޖޭގެ ފަތުރުވެރިކަމުގެ ދާއިރާގައި ޚިދުމަތްދޭ ތަންތަނުގެ ފެންވަރު ދެނެގަތުމާއި ރަނގަޅުކުރަން ޖެހޭ ކަންކަން އިސްލާހުކުރުން ކަމަށެވެ.
މިނިސްޓަރ ވިދާޅުވީ އިންސްޕެކްޝަން ކުރިއަށް ގެންދިއުމަށް ހަމަޖެހިފައި ވަނީ އެ މިނިސްޓްރީއާއި، މޯލްޑިވްސް އެސޯސިއޭޗަން އޮފް ޓޫރިޒަމް އިންޑަސްޓްރީ (މަޓީ) އާއި، ފުލުހުން އަދި އެމްއެންޑީއެފްގެ ބޭފުޅުން ހިމެނޭ ދެ ޓީމެއް، އެކި ޒޯންތަކަކަށް ބަހާލައިގެން ކަމަށެވެ.
މީގެ އިތުރުން، އަލިފާނުގެ ހާދިސާތަކުން ސަލާމަތްވާން އަޅާފައިވާ ފިޔަވަޅުތަކާއި، ސަލާމަތާއި ރައްކާތެރިކަމަށް އަޅާފައިވާ ފިޔަވަޅުތަކާއި އަދި މުވައްޒަފުންގެ ޙައްޤު ކަށަވަރުކުރުމަށްޓަކައި އަޅާފައިވާ ފިޔަވަޅުތަކަށް އިންސްޕެކްޓް ކުރުމުގައި ބަލާނެ ކަމަށް މިނިސްޓަރ ވިދާޅުވި އެވެ.
ފަތުރުވެރިކަމުގެ ދާއިރާގައި ޚިދުމަތްދޭ ތަންތަން އިންސްޕެކްޓް ކުރުމަށް ޓޫރިޒަމް މިނިސްޓްރީ އިން ނިންމާފައިވާއިރު، ފަހަކަށް އައިސް ރާއްޖޭގެ ރިސޯޓްތަކުގައި ވަނީ ނުރައްކާތެރި އަލިފާނުގެ ހާދިސާތައް ހިނގައި، ބޮޑެތި ގެއްލުންތަކެއް ވެފައެވެ.