މިއަހަރުގެ އެޕްރީލް މަހުން ފެށިގެން ރާއްޖޭގެ ހުރިހާ ކަންކޮޅެއްގައި ކާޑުގެ ބާވަތް މާލެއާ އެއް އަގެއްގައި ފޯރުކޮށްދޭން ނިންމާފައިވާ ކަމަށް ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައްޔިތުންގެ މަޖިލީހުގެ 2019 ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރައީސުލް ޖުމުހޫރިއްޔާ އަރުވާ ރިޔާސީ ބަޔާނުގައި ރައްޔިތުންނާ މުޚާތަބުކޮށް ދެއްކެވި ވާހަކަފުޅުގައި ވިދާޅުވީ ކުރިއަށް އޮތް އެޕްރީލް މަހުގައި ކާޑުގެ ބާވަތްތަކުގެ އަގުގެ ތަފާތު ނައްތާލައި އަތޮޅުތެރޭގެ ރައްޔިތުންނަށް މާލެއާ އެއް އަގެއްގައި ކާޑުގެ އަގު ލިބޭނެ އިންތިޒާމް ހަމަޖައްސަވާ ދެއްވާނެ ކަމަށެވެ.
ރާއްޖޭގެ އުތުރާއި މެދު ރާއްޖެތެރެ އަދި ދެކުނުގައި ކާޑުގެ އަގުގެ ފަރަގު އަބަދުވެސް ހުރެއެވެ. މެދު ރާއްޖެތެރެއަށް އުތުރާއި ދެކުނަށްވުރެ އަގު ހެޔޮކޮށް ކާޑު ލިބޭއިރު އެންމެ ކާޑުގެ އަގު ބޮޑުވަނީ ރާއްޖޭގެ އެންމެ ދެކުނުން އައްޑުއާއި ފުވައްމުލަކު ސިޓީއަށެވެ.
އެސްޓީއޯ އިން ބުނަނީ އަގު ބޮޑުވަނީ ކާޑު މާލެއިން ބަރުކޮށްގެން އަތޮޅުތެރެއަށް ފޮނުވުމަށް ހިނގާ ޚަރަދު ފޫބެއްދުމަށް އަގު އުފުލަން ޖެހޭތީ ކަމަށެވެ.