ނަޕޯލީ އަށް ކުޅެމުން އަންނަ ސްލޮވޭކިއާގެ މިޑްފީލްޑަރު މަރެކް ހަމްސިކް އެ ޓީމު ދޫކޮށް ޗައިނާ ގެ ކްލަބެއްކަމަށްވާ ޑާލިއާން އަށް ބަދަލުވުމުގެ ހުރިހާ ކަމެއް ނިމުމަކަށް އައުމުގެ މަގުމަތީގައި ވަނިކޮށް ފައިސާގެ މައްސަލައެއްގެ ސަބަބުން އެ ޓްރާންސްފާގެ ކަންތައް ހުއްޓުމަކަށް ގެނެސްފިއެވެ.
ނަޕޯލީ ދޫކޮށް ޗައިނާގެ ކްލަބަކަށް ހަމްސިކް ބަދަލުވުމަށްޓަކައި ވާހަކަ ދެކެވެމުންދާ ކަމަށް އެ ޓީމުގެ ކޯޗު ކާލޯ އަންޗެލޮޓީ ކަށަވަރުކޮށްދީފައިވާއިރު ނަޕޯލީގެ ރަސްމީ ޓުވިޓާ އެކައުންޓުން ވަނީ ދެ ކްލަބުގެ މެދުގައި އެއްބަސްވުމަކަށް އާދެވިފައިނުވާކަމަށް ބުނެފައެވެ.
"މި ކްލަބުން ވަނީ ހަމްސިކް ޗައިނާގެ ކްލަބަކަށް ބަދަލުވުމުގެ ޓްރާންސްފާގެ ހުރިހާ ކަމެއް މި ވަގުތަށް މަޑުޖައްސާލަން ނިންމާފައި. އެއީ ދެ ކްލަބުގެ ދެމެދު ވީ އެއްބަސްވުމާއި އެއްގޮތަށް ފައިސާގެ އެންމެހާ ކަންތައްތައް ކޮޅެއްގައި ނުޖެހުމުން." ނަޕޯލީގެ ރަސްމީ ވެބްސައިޓްގައި ނެރުނު ބަޔާނެއްގައިވެއެވެ.
2007 ވަނަ އަހަރު އިޓަލީގެ ކްލަބެއްކަމަށްވާ ބްރެޝިއާ އިން ނަޕޯލީ އަށް ބަދަލުވި ހަމްސިކް ވަނީ ލީގުގައި މިދިޔަ ހޮނިހިރު ދުވަހުގެ ރޭ ސަމްޕްޑޯރިއާ އަތުން 3-0 އިން އެ ޓީމު މޮޅުވި މެޗުގައި ކުޅެފައެވެ. އެ މެޗަށްފަހު ކްލަބުގެ ސަޕޯޓަރުންނާއި އޭނާ ވަނީ ވަދާއި ސަލާމްކޮށްފައެވެ.
މިހާތަނަށް އައިއިރު ނަޕޯލީ އާ ޗައިނާގެ ޑާލިއަން އާ ދެމެދު އެއްބަސްވުމަކަށް އާދެވިފައިނުވީނަމަވެސް، ބެލެވޭގޮތުގައި ޗައިނާގެ ޓްރާންސްފާ ބާޒާރު އަދިވެސް ހުޅުވިފައި އޮތުމުން މި ފެބުރުއަރީ މަހުގެ 28 ވަނަ ދުވަހުގެ ނިޔަލަށް އެ ކްލަބަށް ބަދަލުވުމުގެ ފުރުޞަތު އަދި އެބައޮތެވެ.
އުމުރުން 31 އަހަރުގެ ހަމްސިކް ވަނީ ނަޕޯލީގައި ހޭދަކުރީ 12 ސީޒަނުގައި 500 އަށް ވުރެ ގިނަ މެޗު ކުޅެދީ އެ ޓީމާއެކު އިޓާލިއަން ސުޕަކަޕް އެއް ފަހަރު އަދި އިޓާލިއަން ކަޕް ދެ ފަހަރު ހޯދާފައެވެ.
މީގެއިތުރުން، އޭނާ ވަނީ ނަޕޯލީ އަށް ކުރީން އެންމެ ގިނަ މެޗު ކުޅެދީގެން ގުއިސެއްޕޭ ބްރުސްކޮލޮއްޓީ ހަދާފައިވާ ރެކޯޑް މިދިޔަ އަހަރުގެ ނޮވެންބަރު މަހު މުގުރާލިއިރު، އެ ޓީމަށް އެންމެ ގިނަ ލަނޑުޖަހައިދީގެން ޑިއެގޯ މަރަޑޯނާ އަތުގައި ކުރީން އޮތް ރެކޯޑް ވަނީ 2017 ވަނަ އަހަރުގެ ޑިސެންބަރު މަހު މުގުރާލައިފައެވެ. އެގޮތުން، ހަމްސިކް ވަނީ އެ ޓީމަށް މިހާތަނަށް ކުޅެދިން 520 މެޗުގައި 121 ލަނޑުޖަހައިދީ އިތުރު 111 ލަނޑުޖެހުމަށް އެހީތެރިވެދީފައެވެ.