އެމެރިކާގެ މަޝްހޫރު ފުޓުބޯޅަ ކުލަބު، އެލްއޭ ގެލެކްސީ އިން އެޓީމަށް ކުޅުނު އިނގިރޭސި ކުރީގެ ކެޕްޓަން ޑޭވިޑް ބެކަމްގެ ސްޓެޗޫއެއް ދަނޑު ބޭރުގައި ބެހެއްޓުމަށް ނިންމައިފިއެވެ.
އާންމުކޮށް ކުލަބުތަކަށް އެންމެ މުހިންމު ޚިދުމަތް ކޮށްދޭ ފަރާތްތަކުގެ ސްޓެޗޫ ދަނޑު ބޭރުގައި އާންމުކުރާއިރު ބެކަމްއަށް ވެސް މިޝަރަފު ލިބިފައިވަނީ އޭނާ ގެލެކްސީއަށް ކުޅެ އެޓީމަށް ކޮށްދިން ޚިދުމަތުގެ އަގު ވަޒަން ކުރުމުގެ ގޮތުންނެވެ.
ރެއާލް މެޑްރިޑް ދޫކޮށްލުމަށް ފަހު 2007 ވަނަ އަހަރު ބެކަމް ގެލްކްސީއާ ގުޅުނެވެ. ގެލެކްސީގައި ހަ އަހަރު ހޭދަކުރުމަށް ފަހު ބެކަމް ވަނީ އެޓީމަށް ޖެހިޖެހިގެން ދެ ފަހަރު ލީގު ތަށި ހޯދުމަށް އެހީތެރިވެދީފައެވެ.
ބެކަމް ވަނީ 2013 ވަނަ އަހަރު ކުޅުން ހުއްޓާލުމަށް ފަހު މިދިޔަ އަހަރު އިންޓަ މަޔާމީގެ ނަމުގައި ފުޓުބޯޅަ ކުލަބެއް އުފައްދާފައެވެ. އެ ކުލަބަކީ އެލްއޭ ގެލެކްސީ އަށް ނިސްބަތްވާ ޓީމެކެވެ. ބެކަމްގެ މަޔާމީ ލީގާ ގުޅޭނީ 2020 ވަނަ އަހަރުގައެވެ.
ބެކަމް ވަނީ މަޔާމީގެ އިތުރުން އޭނާގެ ކުރީގެ ޓީމްމޭޓުން ކަމަށްވާ ގިގްސް، ނެވިލް، އަދި ސްކޯލްސްއާ ގުޅި އިނގިރޭސި ކުލަބު ސަލްފޯޑް ސިޓީގެ ވެސް ހިއްސާ ނަގާފައެވެ.