ށ. ފީވަކުން ހޮވި 44 މިލިއަން ރުފިޔާގެ އަގުހުރި 82 ކިލޯގެ މާވަހަރުގެ ސާމްޕަލްގެ ނަތީޖާ ލިބެން އަދި ގާތްގަނޑަކަށް މަސް ދުވަސް ވަރު ނަގާފާނެ ކަމަށް އެ މާވަހަރު ހޮވި ހަސަން ބުނެފިއެވެ.
ދުވަހަކުވެސް ރާއްޖެއިން ނުފެންނަ ވަރުގެ ބޮޑު މި މާވަހަރުގެ ސައްހަކަން ޔަގީން ކުރުމަށް ޓެސްޓު ކުރަން ޖެހުނީ ރާއްޖެއިން ބޭރަށެވެ. އެ ޓެސްޓު ހެދުމަށް ފަހު އެއީ ހުދަންބަރެއްކަމަށް ނަތީޖާ ދައްކައިފިނަމަ މިމާވަހަރުގެ އަގު ދިވެހި 44 މިލިއަން ރުފިޔާއަށް އަރާނެ ކަމަށް ކަމާ ބެހޭ ފަރާތްތަކުން ބުނެފައިވެއެވެ.
ހަސަނަށް މި މާވަހަރު ފެނިފައިވަނީ އެކަނި މަހަށް ގޮސް އުޅެނިކޮށެވެ. މާވަހަރު ބަރުކަމުން ހަސަނަށް އެ ދޯންޏަށް ނޭރުވުމުން އޭނާ އެ ރަށަށް ގެނައީ ކަފު ޖަހައިގެންނެވެ.