ޑިފެންސް މިނިސްޓަރ މާރިޔާ އަހުމަދު ދީދީ، އިންޑިޔާގެ ނޫހަކަށް ދެއްވި ބަސްދީގަތުމަކާ ގުޅިގެން ރައްޔިތުންގެ މަޖިލީހަށް ހާޒިރުކޮށް ސުވާލުކުރުމަށް އެދި މަހިބަދޫ ދާއިރާގެ މެމްބަރު އަހުމަދު ތޯރިގް(ޓޮމް) މަޖިލީހަށް ސިޓީއެއް ފޮނުވައިފިއެވެ.
އިންޑިޔާއިން ބޭނުންނަމަ ރާއްޖެ ހިފުމުގެ ގާބިލުކަން އެގައުމަށް ލިބިފައިވާ ކަމަށް ވިދާޅުވެ މާރިޔާ ދެއްކެވި ވާހަކަފުޅުގެ ސަބަބުން ގިނަ ބަޔެއްގެ ފާޑުކިޔުންތައް މާރިޔާއާއި އެމްއެންޑީއެފަށް ވަނީ އަމާޒުވެފައެވެ.
ޚާއްސަކޮށް އިދިކޮޅު ފަރާތްތަކުން ވަނީ މާރިޔާއަށް ފާޑުވިދާޅުވެ އިސްތިއުފާއަށް ވެސް ގޮވާފައެވެ. އެފަދަ ވާހަކަތަކެއް ޑިފެންސް މިނިސްޓަރުގެ މަގާމުގައި ހުންނަވައިގެން މާރިޔާ ދެއްކުމުން އެއީ މިނިސްޓަރުގެ ގާނޫނީ ޒިންމާ އަދާ ކުރެވުންތޯ މެމްބަރުން ތޯރިގް ވަނީ ސުވާލު އުފައްދާފައެވެ.
މާރިޔާގެ ވާހަކަތައް ބައެއް ފަރާތްތަކުން އޮޅުވާލި ކަމަށް ބުނެ ގައުމީ ދިފާއީ ބާރުން ވަނީ އެފަދަ ކަންތައްތައް ނުކުރެއްވުމަށް ގޮވާލާފައެވެ.