އެމްޑީޕީގެ ވެރިކަމެއްގައި ޑޮކްޓަރުން ތަމްރީނު ކުރުމުގެ ސްކޮލަޝިޕެއް ތައާރަފްކޮށް، ފަސް އަހަރުތެރޭ 2،000 ޑޮކްޓަރުން ތަމްރީނު ކުރާނެ ކަމަށް އެ ޕާޓީން ބުނެފި އެވެ.
އެމްޑީީޕީގެ ސިއްހީ ސިޔާސަތު "ހިތްހަމަޖެހުން: ގަރުބަގަތީއްސުރެ، ނެތިއުމަށް ދާންދެން" އިފްތިތާހުކޮށް ދެއްވަމުން ހިތަދޫގައި މިއަދު ހަވީރު ބޭއްވި ބައްދަލުވުލުވުމުގައި އެ ޕާޓީގެ ރިޔާސީ ކެންޑިޑޭޓް އަދި ކުރީގެ ރައީސް މުހައްމަދު ނަޝީދު ވިދާޅުވީ "ހުނަރު" ޕްރޮގްރާމްގެ ތެރެއިން ނަރުހުންގެ ގޮތުގައި 150 މީހުން، ނަރުހުންގެ އެހީތެރިންގެ ގޮތުގައި 120، ފާމަސީ އެސިސްޓެންޓުންގެ ގޮތުގައި 150 އަދި އެޓެންޑެންޓުންގެ ގޮތުގައި ވެސް 200 މީހުން ތަމްރީނުކުރާނެ ކަމަށެވެ.
އަދި ވެރިކަމުގެ ފުރަތަމަ 18 މަސް ދުވަހުގެ ތެރޭގައި ރާއްޖޭގެ ތިން ސަރަހައްދެއްގައި ޓާޝިއަރީ ތިން ހޮސްޕިޓަލް ވެސް ގާއިމުކުރައްވާނެ ކަމަށް ނަޝީދު ވިދާޅުވި އެވެ.
މީގެ އިތުރަށް ނަޝީދު ވިދާޅުވީ ސިއްހީ ދާއިރާ ކުރިއެރުވުމަށް ކުރާ މަސައްކަތުގެ ތެރެއިން ރާއްޖޭގެ ހުރިހާ ރަށެއްގެ ރައްޔިތުން ދުޅަހެޔޮ ހާލެއްގައި ބޭތިއްބުމަށް ގަވައިދުން އެ މީހުންގެ ހާލު ބަލައި އެކަންކަން ރިޕޯޓް ކުރާނެ 250 ސިއްހީ ހަރާކާތްތެރިން ހުރިހާ ހިސާބެއްގައި ތައާރަފް ކުރެވޭނެ ކަމަށެވެ.
އަދި ދިވެހި ބޭސްވެރިކަން ކުރިއަރުވައި އެ މަސައްކަތް ކުރިއަށް އޮތް ތަނުގައި ދިރުވާ އާލާކުރުމަށް ވެސް މަސައްކަތް ކުރާނެ ކަމަށް ވިދާޅުވި އެވެ.
އެމްޑީޕީ ސަރުކާރުގެ ސިއްހީ ސިޔާސަތުގައި، ހާއްސަ ހާލަތްތައް ކުރިމަތިވާ ބަލި މީހުންނަށް އިތުރު ލުއިތަކެއް ލިބޭ ގޮތަށް އާސަންދައިގެ ދަށުން ދެ ބައެއް ތައާރަފް ކުރެވިގެން ދާނެ ކަމަށް ނަޝީދު ވިދާޅުވި އެވެ.
އޭގެ ތެރޭގައި ތެލެސީމީއާ، ކެންސަރު އަދި ޓީބީ ފަދަ ބަލިތައް ޖެހިފައިވާ މީހުންނަށާއި އެކްސިޑެންޓް ފަދަ ކުއްލި ހާދިސާތައް ކުރިމަތިވާ ފަރާތްތައް ބޭރަށް ފޮނުވައިގެން ބޭސް ކުރެވޭނެ އިންތިޒާމްތަކެއް އާސަންދައިގެ ދަށުން ހަމަޖެހިގެން ދާނެ ކަމަށް ނަޝީދު ވިދާޅުވި އެވެ.