ޑިޒްނީ އިން 1992 ވަނަ އަހަރު އުފެއްދި މަޝްހޫރު ކާޓޫނޫ ކަމުގައިވާ "އަލާދީން"ގެ ލައިވް-އެކްޝަން ރީމޭކްގެ ފުރަތަމަ ޓްރެއިލާ މި އަހަރުގެ ގްރެމީ އެވޯޑްސް ޙަފްލާގައި ނެރެފައިވާއިރު، ގިނަ ބަޔަކު އިންތިޒާރުކުރަމުން އައި ވިލް ސްމިތުގެ ކެރެކްޓާވެސް ޓްރެއިލާއިން ވަނީ ފެނިފައެވެ.
އެ ފިލްމްގައި ވިލް ސްމިތު އަދާކުރަނީ "ޖީނީ"ގެ ރޯލެވެ. ފިލްމް ރިލީޒްކުރުމަށް ހަމަޖެހިފައި ވަނީ އޮރިޖިނަލް ކާޓޫން ރިލީޒްކުރިތާ 27 އަހަރު ފަހުން އަންނަ މެއި މަހުގެ ތެރޭގައެވެ.
ފިލްމްގައި ވިލް ސްމިތުގެ ކެރެކްޓާ ހުންނަ ގޮތާއިމެދު ގިނަ ބައެއްގެ ފާޑުކިޔުންތައް އޭނާ އަށް ވަނީ އަމާޒުވެފައެވެ. ޓްރެއިލާއިން ފެނިގެންދާ ގޮތުގައި "ޖީނީ" ހުންނާނީ ނޫ ކުލައިގައެވެ.
މި ފިލްމްގައި "އަލާދީން"ގެ ރޯލުން މޭނާ މައްސޫދު ފެނިގެންދާއިރު، "ޖޭސްމިން"ގެ ރޯލުން ފެނިގެންދާނީ ނައޯމީ ސްކޯޓް އެވެ.
މި ފިލްމަކީ ޑިޒްނީ އިން މި ފަހަކަށް އައިސް އުފައްދަމުން އަންނަ ލައިވް-އެކްޝަން ރީމޭކްތަކުގެ ތެރެއިން އެއް ފިލްމެވެ.