މަޖިލީހުގެ އިންތިހާބުގައި ވާދަ ކުރުމަށް އެމްޑީޕީން ހުށަހެޅި 86 ފޯމްގެ ތެރެއިން އިލެކްޝަން ކޮމިޝަން (އީސީ) އިން ބަލައި ނުގަތް ފަސް ފޯމެއްގެ މައުލޫމާތުތައް ފުރިހަމަކޮށް އީސީއަށް އަލުން ހުށަހަޅައިފިއެވެ.
އެމްޑީޕީގެ މަޖިލިސް ކެމްޕޭނުގެ ސްޕޯކްސްޕާސަން އަފްޝަން ލަތީފް ވިދާޅުވީ އިލެކްޝަނުން ބަލައި ނުގަތް ފަސް ފޯމެއްގެ މައުލޫމާތު ފުރިހަމަ ކުރުމަށްފަހު އަލުން ހުށަހަޅާފައިވާ ކަމަށެވެ. ނަމަވެސް އެ ފަސް ދާއިރާއަކީ ކޮން ދާއިރާތަކެއްކަން އަފްޝަން ވިދާޅެއް ނުވެއެވެ.
އެމްޑީޕީން މިފަހަރުގެ އިންތިހާބުގައި ވާދަ ކުރާ 86 ކެންޑިޑޭޓުންގެ ފޯމު އިލެކްޝަނަށް ހުށަހެޅުމުން އޭގެ ތެރެއިން 10 ކެންޑިޑޭޓެއްގެ ފޯމް އިލެކްޝަނުން ވަނީ މައުލޫމާތު ފުރިހަމަ ނުވާތީ ބަލައި ނުގެންފައެވެ.
އެމްޑީޕީން އަންނަނީ "އެޖެންޑާ 19" ނަމުގައި މަޖްލިސް އިންތިހާބަށް ކެމްޕެއިން ކުރަމުންނެވެ.