ކޮރަޕްޝަން ތަހުގީގު ކުރާ މިނިވަން އިދާރާ، އެންޓި ކޮރަޕްޝަން ކޮމިޝަނުގެ މެމްބަރުންނަށް ވެސް އެމްއެމްޕީއާރްސީ ބޮޑު ޚިޔާނާތުގެ ފައިސާ އިން ނަފާ ވެފައިވާ ކަމަށް ތުހުމަތު ކުރެވޭއިރު އެ ފައިސާ އިން ޚިޔާނާތުގެ ތަފްސީލު ހާމަކުރާނީ ކިހިނެއްތޯ ކުރީގެ އޮޑިޓާ ޖެނެރަލް ނިޔާޒް އިބްރާހިމް ސުވާލު އުފައްދައިފިއެވެ.
ބޮޑު ޚިޔާނާތުގެ ފައިސާ ވަދެފައިވާ އެކައުންޓުތަކާއި އެ އެކައުންޓުތަކުގެ ވެރިން ހާމަ ކުރުމަށް ގޮވާލައި ބޮޑު މުޒާހަރާއަކަށް އަންނަ ހުކުރު ދުވަހު ތައްޔާރުވަމުން އަންނައިރު އާންމު ރައްޔިތުންގެ ވަރަށް ގިނަ ބަޔަކު ވަނީ މަޖިލިސް އިންތިޚާބު ބޭއްވުމުގެ ކުރިން އެ ނަންތައް ހާމަކުރުމަށް ގޮވާލަމުންނެވެ.
ދައުލަތުގެ އިދާރާތަކަށް ޕްރެޝަރު ބޮޑުވެ އޭސީސީން އެ މައްސަލައާ ގުޅޭ އިތުރު މައުލޫމާތުތައް ހާމަކުރަން ވިސްނަމުން އަންނަ ކަމަށް ބުނުމުން ނިޔާޒް ވަނީ ޚުދު އޭސީސީގައި ތިއްބެވި މެމްބަރުންނަށް ވެސް ޚިޔާނާތުގެ ފައިސާގެ ތުހުމަތު ކުރެވިފައިވާކަން ފާހަގަކޮށްފައެވެ.
ރައީސް ކަމުގައި ޔާމީން ހުންނެވިއިރު އޮޑިޓް ރިޕޯޓުތަކުން ދައުލަތުގެ އެތައް ބައިވަރު ފައިސާއެއް މަދުވެފައިވާތީ އެކަން ރައީސްގެ ސަމާލުކަމަށް ގެނައިތާ މާގިނަ ދުވަސްތަކެއް ނުވެ ނިޔާޒްގެ ވަޒީފާ ގެއްލިގެން ދިޔައެވެ. އަލް ޖަޒީރާ އިން ތައްޔާރުކުރި "ސްޓީލިން ޕެރެޑައިސް" އިންޓަވިއުއަށް މައުލޫމާތު ދެމުން ނިޔާޒް ބުނެފައިވަނީ އޭނާއަށް މަރުގެ އިންޒާރުވެސް އޭރު ލިބުނު ކަމަށެވެ.
އެމްއެމްޕީއާރްސީ ޚިޔާނާތުގެ ފައިސާ މަޖިލިސް މެމްބަރުންނަށާއި އޭރު ސަރުކާރުގައި ތިބި އިސްވެރިންނަށް އަދި މިނިވަން މުއައްސަސާތަކުގެ ވެރިންނާއި މެމްބަރުންނަށް ލިބިފައިވާ ކަމަށް އަޑު ފެތުރިފައިވެއެވެ. ގިނަ މަޖިލިސް މެމްބަރުން 19 ވަނަ މަޖިލީހަށް ވެސް ކުރިމަތިލާން ނިންމާފައިވާއިރު އިންތިޚާބުގެ ކުރިން ފައިސާ ނެގި މެމްބަރުން ހާމަކުރުމަށް ރައްޔިތުން އަންނަނީ އެދެމުންނެވެ.