ޗިކުންގުންޔާ ހޭލުންތެރި ކުރުމުގެ މަސައްކަތް އަންނަނީ ކުރަމުން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ބުނެފި އެވެ.
އެޗްޕީއޭއިން ބުނީ މިދިޔަ މަހުގެ 15 އިން މި މަހުގެ 8 ވަނަ ދުވަހާ ހަމައަށް ޗިކުންގުންޔާ ޖެހިގެން 63 މީހަކު ޑޮކްޓަރަށް ދައްކާފައިވާ ކަމަށެވެ.
މަދިރީގެ ސަބަބުން ޖެހޭ ބައްޔެއް ކަމަށްވާ ޗިކުންގުންޔާ މިދުވަސްވަރު މާލެ ސަރަހައްދުގައި އަންނަނީ އިތުރުވަމުން ނެވެ.
މި ބައްޔަކީ ޖަރާސީމު ހުރި މީހެއްގެ ގައިން މަދިރި ލޭ ބުއިމަށް ފަހު އެހެން މީހެއްގެ ގައިންލޭ ބުއިމުގެ ތެރޭގައި ޖަރާސީމު އަނެކާގެ ހަށިގަނޑަށް ވާސިލްވުމުން އަރާ ބައްޔެކެވެ.
މި ބަލީގެ ޖަރާސީމު ހަށިގަނޑަށް ވަނުމާއި މިބަލީގެ އަލާމާތްތައް ފެނުމާ ދެމެދު ނަގާނީ ދެ ދުވަހާއި 12 ދުވަހުގެ މުއްދަތެކެވެ.