ރާއްޖެއަށް މީހުން ފޮނުވުން މަޑުޖައްސާލުމަށް ބަންގްލަދޭޝްގެ އެކްޕޭޓްރިއެޓްސް ވެލްފެއަރ އެންޑް އޯވަސީސް އެމްޕްލޯއިމަންޓް މިނިސްޓްރީ (އީޑަބްލިއުއޯއީ) އިން އެގައުމުގެ އެޖެންސީތަކަށް އިލްތިމާސް ކޮށްފިއެވެ.
އީޑަބްލިއުއޯއީއިން ރާއްޖެއަށް ވަޒީފާ އަދާ ކުރުމަށް އެގައުމުގެ ރައްޔިތުން ނުފޮނުވަން އިލްތިމާސްކޮށްފައިވަނީ ރާއްޖޭގައި ހުންނަ ބަންގްލަދޭޝް އެމްބަސީގެ އެދުމުގެ މަތިން ކަމަށް ރިޕޯޓް ތައް ބުނެއެވެ. އެގޮތުން މިވަގުތު ރާއްޖޭގައި ބިދޭސީންނައް ވަޒީފާގެ ދަތިކަން އެބައޮތް ކަމަށާއި، އެތައް ބިދޭސީންނެއް ވަޒީފާ ނެތި ރާއްޖޭގައި އުޅެމުންދާކަމަށެވެ.
ގަވާއިދާ ހިލާފަށް ރާއްޖޭގައި ގިނަ އަދަދެއްގެ ބިދޭސީން އުޅެމުންދާ އިރު އެފަދަ ބިދޭސީން ހޯދުމަށް އިމިގްރޭޝަނުން ވަނީ ހާއްސަ އޮޕަރޭޝަނެއް ފަށާފައެވެ. އެގޮތުން މިހާރުވެސް ބައެއް ބިދޭސީން އިމިގްރޭޝަންގެ ބެލުމުގެ ދަށުގައި ތިބި އިރު އަތޮޅު ތެރޭގައި ތިބި ގަވާއިދާއި ހިލާފު ބިދޭސީން ހޯދުމަށް ދަނީ މަސައްކަތް ކުރަމުންނެވެ.