އަމީތާބް ބައްޗަން އާއި ބޮލީވުޑްގެ ބަތަލާ ތާޕްސީ ޕައްނޫގެ އެންމެ ފަހުގެ ފިލްމް، "ބަދްލާ"ގެ ޓްރެއިލާ ދައްކާލައިފި އެވެ.
އެ ފިލްމްގެ ކެރެކްޓާތަކުގެ ޕޯސްޓަރުތައް ހޯމަ ދުވަހު ނެރެފައިވާއިރު، ޕޯސްޓަރުތަކުގައި ލިޔެފައި އޮތީ "މާފް ކަރްނާ ހަރް ބާރް ސަހީ ނެހީ ހޯތާ" އެވެ. އޭގެ މާނައަކީ ކޮންމެ ފަހަރަކު މަޢާފްކުރުމަކީ ރަނގަޅު ކަމެއް ނޫން ކަމަށެވެ. އެއް ޕޯސްޓަރުގެ ފޯކަސް އަމީތާބް އަށް ދީފައިވާއިރު، އަނެއް ޕޯސްޓަރުން ފެނިގެންދަނީ ތާޕްސީ އެވެ.
"ބަދްލާ"ގެ ޓްރެއިލާ އިއްޔެ ރިލީޒްކުރިއިރު، ޓްރެއިލާ އަށް ވަނީ ގިނަ ބައެއްގެ ތަރުހީބު ލިބިފައެވެ.
ޝާހް ރުކް ޚާންގެ ޕްރޮޑަކްޝަން ހައުސް އިން އުފައްދާ މި ފިލްމް ޑައިރެކްޓްކޮށްފައި ވަނީ ސުޖޯއި ގޯޝް ކަމުގައިވާއިރު، ފިލްމް ޕްރޮޑިއުސްކުރަނީ ގޯރީ ޚާން އެވެ. އަމީތާބް އާއި ސުޖޯއި ވަނީ މީގެ ކުރިންވެސް "ޓީން" އާއި "އަލާދީން" ފަދަ ފިލްމްތަކުގައި އެކުގައި މަސައްކަތްކޮށްފަ އެވެ.
"ބަދްލާ" ރިލީޒްކުރުމަށް ހަމަޖެހިފައި ވަނީ އަންނަ މާޗު މަހުގެ 08 ވަނަ ދުވަހު އެވެ.