އެމްއެމްޕީއާރްސީ ބޮޑު ޚިޔާނާތުގެ ފުރިހަމަ ރިޕޯޓު އޭސީސީން މިއަދު އާންމުކޮށްފިއެވެ.
ހަތް ސަތޭކަ ސޮފުހާއަށް ވުރެ ގިނަ ރިޕޯޓުގައި އޭސީސީގެ ތަހުގީގަށް އެނގިފައިވާ ހުރިހާ ކަމެއް ވަނީ ހިމަނާފައެވެ. އޭގެ ތެރޭގައި ކުރީގެ ރައީސް ޔާމީންގެ ވެރިކަމުގައި ގަވާއިދާއި ޚިލާފަށް ދޫކުރި ރަށްތަކާއި ލިބުނު ފައިސާ އަދި ފައިސާއާށް ވީގޮތް ހިމަނާފައިވެއެވެ.
ރިޕޯޓުގައި ދައުލަތުން ޚިޔާނާތްތެރިވި ފައިސާ ނެގުމަށް ފަހު ޖަމާކުރި އެސްއޯއެފް އެކައުންޓަށް ފައިސާ ޖަމާ ކުރިކަމާއި އެސްއޯއެފްގެ އެކައުންޓުން ފައިސާ ޖަމާކުރި އެކައުންޓުތަކުގެ މައުލޫމާތު ހިމަނާފައިވެއެވެ.
ރާއްޖޭގެ 57 ރަށެއް ނުއަގުގައި ގަވާއިދާއި ޚިލާފަށް ވިއްކާފައިވާ ކަން ރިޕޯޓުގައި ފާހަގަކޮށްފައިވާއިރު ރަށްތައް ދޫކުރުމަށް ފަހު އެކުއިޒިޝަން ފީގެ ގޮތުގައި ދައުލަތަށް ލިބިފައިވަނީ 12 މިލިއަން ޑޮލަރެވެ. އޭސީސީގެ ތަހުގީގަށް އެނގިފައިވާ ގޮތުގައި 77 މިލިއަން ޑޮލަރު ލިބެން ޖެހެއެވެ. ދައުލަތަށް ލިބުނު 12 މިލިއަން ޑޮލަރުން ވެސް އެކި މިންވަރުން އެސްއޯއެފްގެ އެކައުންޓަށް ޖަމާ ކޮށްފައިވާކަން ރިޕޯޓުން ހާމަވެފައެވެ.
އޭސީސީން މިރިޕޯޓު އާންމުކޮށްފައިވާއިރު މަނީ ލޯންޑަރިންގެ ތުހުމަތު ކުރީގެ ރައީސް ޔާމީނަށް ކުރެވި އިއްޔެ ދައުލަތުން ވަނީ އެމަނިކުފާނާ ދެކޮޅަށް ދައުވާ އުފުލާފައެވެ.