އެމްއެމްޕީއާރްސީއަށް ލިބިފައިވާ ދައުލަތުގެ ފައިސާގެ ތެރެއިން 1 މިލިއަން ޑޮލަރަށް ވުރެ ގިނަ އަދަދެއް ކުރީގެ ރައީސް ޔާމީންގެ ވެރިކަމުގައި އާއަހަރުގެ ޝޯއާއި އެހެނިހެން މުނިފޫހިފިލުވުމުގެ ހަރަކާތްތައް ބޭއްވުމަށް ހޭދަކޮށްފައިވާކަން އޭސީސީގެ ތަހުގީގީ ރިޕޯޓުން އެނގިއްޖެއެވެ.
އޭސީސީން މިއަދު ނެރުނު 776 ސޮފްހާގެ ރިޕޯޓުގައި އެސްއޯއެފް ޕްރައިވެޓް ލިމިޓެޑް މެދުވެރިކޮށް މުނިފޫހި ފިލުވުމަށް ކޮށްފައިވާ ޚަރަދުތަކުގެ ތެރޭގައި ޓޫރިޒަމް މިނިސްޓަރުގެ މަގާމުގައި ކުރީގެ ނައިބު ރައީސް އަހުމަދު އަދީބު ހުންނެވިއިރު 2015 ވަނަ އަހަރުގެ އާ އަހަރުގެ ބޮޑު ޝޯގައި މަޝްހޫރު ލަވަކިޔުންތެރިޔާ އޭކަން ރާއްޖެ ގެނައުމާއި އިވެންޓު ބޭއްވުމަށް އިންފިނިޓީ ޕްރޮޖެކްޓް ކްރިއޭޝަން ލިމިޓެޑަށް އެސްއޯއެފް އިން ވަނީ ޖުމުލަ 80،488.30 ޑޮލަރު ޖަމާކޮށްފައެވެ. މިއީ ދިވެހި ރުފިޔާއިން ބަލާނަމަ 1،241،129.586ރ. އެވެ. މީގެ އިތުރުން އެކުންފުނީގެ ފަރާތެއް ކަމަށްވާ ޗެތިކާ ކަރުނަރެތްނެގެ އެކައުންޓަށް އެސްއޯއެފުން ވަނީ 130،867.30 ޑޮލަރު ޖަމާކޮށްފައެވެ.
ރާއްޖޭގައި ޝޯ ދިނުމަށް މަޝްހޫރު ލަވަކިޔުންތެރިޔާ ޝޯން ޕޯލް ގެނައުމަށް ޖުމުލަ 219،179.01 ޑޮލަރު ވަނީ ހޭދަކޮށްފައެވެ. އެއީ އޭނާގެ ދަތުރު ޚަރަދާއި ހުރުން އަދި ޝޯ ދިނުމަށް ކުރި ޚަރަދު އެއްކުރުމަށް ފަހު ކަމަށް އޭސީސީގެ ރިޕޯޓުގައި ބުނެފައިވެއެވެ.
އެމެރިކާގެ މާކެޓިން ދާއިރާގައި ހަރަކާތްތެރިވާ އެމްޕަޔާ މީޑިޔާ ގްރޫޕަށް 654،608 ޑޮލަރު ޖަމާކޮށްފައިވާ ކަމަށް ވެސް ރިޕޯޓުގައި ބުނެފައިވެއެވެ.
މީގެ އިތުރުން އައްޑޫ ސިޓީގެ ފޭދޫ ގައި ސަނަމް ޕޫރީ ގެނެސް ޝޯ ބޭއްވުމަށް އެސްއޯއެފް އިން ވަނީ 50،380.00 ޑޮލަރު ހޭދަކޮށްފައެވެ. މި ފައިސާ ޖަމާކޮށްފައިވަނީ އިންޑިޔާގެ މިއުޒިކް ފަންނާނުންނަށް ޚާއްސަކޮށް ހިންގާ ޓެލެންޓް މެނޭޖްމެންޓް ކުންފުންޏަކަށް ކަމަށާއި އެ ޚަރަދުތައް ކޮށްފައިވަނީ ސަނަމް ޕޫރީ ރާއްޖެ ގެނެސް ޝޯ ދިނުމަށް ކަމަށް ތަހުގީގަށް އެނގިފައިވާ ކަމަށް އޭސީސީން ރިޕޯޓުކޮށްފައިވެއެވެ.