އެމްއެމްޕީއާރްސީ ބޮޑު ޚިޔާނާތުގެ ފައިސާއިން އެއްވެސް ފައިސާ އެއް ލިބިފައިނުވާ ކަމަށް ވިލުފުށި ދާއިރާގެ މެމްބަރު ރިޔާޒު ރަޝީދު ވިދާޅުވެއްޖެއެވެ.
ބޮޑު ޚިޔާނާތުގެ ފުރިހަމަ ތަހުގީގީ ރިޕޯޓު މިއަދު އޭސީސީން ހާމަކޮށްފައިވާއިރު އެސްއޯއެފްގެ އެކައުންޓުން ރިޔާޒު ރަޝީދުގެ އެކައުންޓަށް 424،255 ޑޮލަރު ޖަމާކޮށްފައިވާ ކަމަށް ބަޔާންކޮށްފައިވެއެވެ.
އެމްއެމްޕީއާރްސީގެ ޚިޔާނާތުގެ ފައިސާ އެސް.އޯ.އެފް ޕްރައިވެޓް ލިމިޓެޑްގެ ނަމުގައި ބޭންކް އޮފް މޯލްޑިވްސް ޕަބްލިކް ލިމިޓެޑްގައި ހުޅުވާފައިވާ ނަންބަރު 002-700925-7701 އެމެރިކާ ޑޮލަރު އެކައުންޓަށް ޖަމާކުރުމަށްފަހު، އަމިއްލަ ފަރާތްތަކުގެ އެކައުންޓުތަކަށް ޖަމާކުރި ފައިސާއާއި އެކައުންޓުތަކުގެ ވެރިންގެ މައުލޫމާތު ރިޕޯޓުގައި ހާމަކޮށްފައިވެއެވެ.
އޭސީސީން ބުނެފައިވަނީ މި ތަހުގީގަށް 163 މީހެއްގެ 28،000 އަށްވުރެ ގިނަ ލިޔެކިޔުންތައް ބަލާ މުރާޖައާ ކޮށްފައިވާ ކަމަށެވެ. ނަމަވެސް ރިޔާޒު ރަޝީދު ޓުވިޓާގައި ވަނީ އޭނާއަށް އެސްއޯއެފުން އެއްވެސް ފައިސާއެއް ދީފައި ނޯންނާނެ ކަމަށެވެ.