މައިލޯ ސްޓްރީޓް ސޮކާ 2019 ގައި ރޭ ކުޅުނު މެޗުތައް ޔަންގް ވަންސް އަދި ކަޅަ ބެންޗާ ކާމިޔާބުކޮށްފިއެވެ.
ރޭގައި ވެސް މުބާރާތުގެ ތިން މެޗު ކުޅުނު އިރު ފުރަތަމަ މެޗުގައި ކަޅަ ބެންޗާއާއި ޔަންގް މެޖެންޓާ ބައްދަލުކޮށް، ކަޅަ ބެންޗާ ވަނީ 0-1 ގެ ނަތީޖާއިން މެޗުން މޮޅުވެފައެވެ. މިމެޗުގެ ހަމައެކަނި ލަނޑަކީ ކަޅަބެންޗާ ޓީމުގެ ޖާޒީ ނަމްބަރު 8، އިބްރާހިމް އަސްވަދު ކާމިޔާބުކުރި ލަނޑެކެވެ.
ދެވަނަ މެޗުގައި ރޮޗެސްޓާއާއި ސްކޫޕް ކަންމަތީގެ ކުރިމަތިލުމެއް ފެނިގެސް ގޮސްފައިވާއިރު މިމެޗުގައި ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ.
ފަހު މެޗުގައި ފޯރިގަދަ ކުޅުމެއް ފެނިގެން ގޮސްފައިވާއިރު ޔަންގް ވަންސް އަދި ފްރެންޑްސް ކުލަބު ބައްދަލުކުރި މެޗުގައި މިރޭގެ އެހެން މެޗުތަކާ ޚިލާފަށް ގޯލުތައް ފެނިގެން ދިޔައެވެ. ޖުމުލަ ފަސް ލަނޑު މިމެޗުގައި ފެނިގެން ގޮސްފައިވާއިރު ޔަންގް ވަންސް މެޗު ކާމިޔާބުކުރީ 2-3 އިން މޮޅު ވެގެންނެވެ.
އިބްރާހިމް އިފާން އަދި ހަސަން އައްސަދް ފްރެންޑްސްއަށް ލަނޑު ޖަހާ ދީފައިވާއިރު ޔަންގް ވަންސްގެ ތިން ލަނޑުވެސް ކާމިޔާބުކޮށްފައިވަނީ އައިމަން ނަސީރެވެ. މެޗުގެ ފުރަތަމަ ހާފު ނިމިގެން ދިޔައީ އައިމަންގެ ލަނޑަކުން ޔަންގް ވަންސް ކުރީގައި އޮވެގެންނެވެ. ފަހު ހާފުގައި ހަތަރު ލަނޑު ފެނިގެން ގޮސްފައިވާއިރު ދެ ޓީމަށް ވެސް ވަނީ އިތުރު ފުރުސަތުތަކެއް ލިބި ބޭކާރުވެފައެވެ.