ދެ ކިޑްނީ ފެއިލްވެފައިވާ އަންސާރާއަށް އެހީވުމަށް އީއްޔެ ބޭއްވި ފަންޑުރައިޒިންގ އިވެންޓަށް 52،300ރ. ލިބިއްޖެއެވެ.
އަންސަރާގެ އާއިލާ އާއި ހެޔޮ އެދޭ ފަރާތްތަކުން އިއްޔެ އާއި ރޭ ކުރިއަށް ގެންދިޔަ މި އިވެންޓް ގިނަ ބައެއްްގެ އެހީތެރިކަން ވަނީ ލިބިފައެވެ.
މި އިވެންޓް އިންތިޒާމު ކުރުމުގައި އިސްކޮށް ހަރަކާތް ތެރިވި ސ. ހިތަދޫ ކޯޒީކޯނަރ ޢާއިޝާ މުހައްމަދު "އައްޑޫލައިވް" އަށް މަޢުލޫމާތު ދެމުން ބުނީ އިއްޔެގެ ހަރަކާތަށް އާއްމުންގެ ބޮޑު އެހީތެރިކަމެއް ލިބިފައިވާ ކަމަށެވެ.
"އަންސާރާގެ އެކައުންޓަށް ޖަމާވެފައި ހުރި ޖުމުލަ އަދަދު އަދި ބުނާކަށް ނޭނގޭ. ޖުމުލަ އަދަދު އެނގޭނީ ބޭންކު ހުޅުވުމުން ޗެކް ކޮށްލުމުން. 52،300ރ. އެއީ ފަންޑު ފޮށްޓާއި އެއްޗެހި ވިއްކައިގެން ލިބުނު އަދަދު،"
އަންސާރާއަށް އެހީ ހޯދުމަށް ކުރިއަށް ގެންދިޔަ އިވެންޓުގައި އައްޑޫގެ ތަފާތު ދާއިރާތަކުގެ މީހުން ވަނީ ބައިވެރިވެފައެވެ. އޭގެ ތެރޭގައި އައްޑޫގެ މޭޔަރ އަބްދުﷲ ސާދިޤު، އަންހެނުންގެ ކޮމިޓީގެ ރައީސާ އާއިޝަތު ނަދާ ބައިވެރިވެ ވަޑައިގެންނެވިއެވެ.
މީގެ އިތުރުން ހިތަދޫ އުތުރު ދާއިރާގެ މެމްބަރ، މުހައްމަދު އަސްލަމާއި މިދިޔަ ޕުރައިމަރީގައި ވާދަ ކުރެއްވި ގިނަ ކެންޑިޑޭޓުން ބައިވެރިވި އެވެ.
"އަޅުގަނޑު މެންނަށް މިކަމުގައި ވަރަށް ގިނަ ބައެއްގެ އެހީތެރިކަމާއި އެއްބާރުލުން ލިބުނު ، އޭގެ ތެރޭގައި އަންހެނުންގެ ކޮމިޓީ، ފޯޒީ ކަޑާ، އަދި މި ސަރަހައްދުގައި ތިބި އެހެން ކަޑަ ތަކުގެ ވެސް ފުލް ސަޕޯޓް ލިބުނު. މި ހުރިހާ ފަރާތްތަކަށް ވެސް އަޅުގަނޑު ހިތުގެ އަޑިން ޝުކުރު ދަންނަވަން، ވަކިން ހާއްސަ ކޮށް އާއިލާގެ އެއްބާރުލުން ފާހަނގަ ކޮށްލަން. އަމަލީ ގޮތުންނާއި މާލީ ގޮތުން މި ކަމުގައި އެހީ ތެރިވި ހުރިހާ ފަރާތް ތަކަށް ވަރަށް އިޙްލާސް ތެރި ކަމާއެކު ފަށްފަށުން ޝުކުރު ދަންނަވަން،" އައިޝާ ބުނެފައިވެއެވެ.
ފުރާނައަށް ނުރައްކާ ކުރަނިވި ކިޑްނީގެ ބައްޔަކާއި ހަނގުރާމަ ކުރަމުންދާ އަންސާރާ އަށް އެހީ ވުމަށް ހިންގި ކާމިޔާބު މި އިވެންޓަށް ފަހު ފަންޑުރައިޒިންގ ގެ އިތުރު ހަރަކާތެއް މިއަދު ވެސް ބާއްވަން ނިއްމާފައިވާ ކަމަށް މިކަން އިންތިޒާމް ކުރާ ފަރާތުން ވަނީ ބުނެފައެވެ.
އަންސާރާގެ ކިޑްނީގެ މަސައްކަތް ހުއްޓި އޭނާ މަރާއި ހަނގުރާމަ ކުރަމުންދާއިރު އޭނާގެ ބައްޔަށް 400،000 އެއްހާ ރުފިޔާ ބޭނުންވެއެވެ.
މިހާތަނަށް ހިންގުނު ހަރަކާތްތަކުން ލައްކައެއްްހާ ރުފިޔާ ވަނީ ލިބިފައެވެ.
އެހީ ދެއްވަން ބޭނުންފުޅުވާ ފަރާތްތަކުން އެހީ ފޮނުއްވާނީ
Ansara Ahmed/ 7708505270101