ފުލުހުންގެ ސްޓްރެޓެޖިކް ޕްލޭން ޑިވެލޮޕްމެންޓް މަހާސިންތާ އަތޮޅުތެރޭގައި ބާއްވައިފި އެވެ.
މި މަހާސިންތާ އަކީ ފުލުހުންގެ ޚިދުމަތް ތަރައްގީ ކޮށް މިހާރަށް ވުރެ ފުޅާކޮށް ތަރައްޤީ ކުރުމަށް ގެންނަޖެހޭ ބަދަލުތަކާ މެދު މަޝްވަރާ ކުރުމަށް ފުލުހުންގެ ސްޓްރެޓެޖިކް ޕްލޭން ޑިވެލޮޕްމެންޓް އިން އަތޮޅުތެރޭގައި ބޭއްވި މަހާސިންތާ އެކެވެ.
މި މަހާސިންތާ ގައި ކުރިއަށް އޮތް ފަސް އަހަރު މުއައްސަސާގެ ފެންވަރުގައި ހާސިލްކުރަން ބޭނުންވާ ލަނޑުދަޑިތަކަކީ ކޮބައިތޯއާއި އެމަގަށް ވާސިލްވުމަށް ކުރަންޖެހޭ މަަސައްކަތްތަކާއި، ދިމާވެދާނެ ގޮންޖެހުންތަކާއި ގުޅޭ ގޮތުން މުވައްޒަފުންގެ ޚިޔާލު ހޯދައި މަޝްވަރާކޮށްފައި ވެއެވެ.
ފުލުހުން ބުނެފައިވަނީ މަރުކަޒުތަކުގައިހުރި ދަތިތަކާއި އެމަރުކަޒުތަކުންދޭ ޚިދުމަތްތައް ތަރައްގީކޮށް ކުރިއެރުވުމަށް ކުރެވިދާނެ ކަންކަމާ ގުޅޭ ގޮތުން މަޝްވަރާކުރުމަށް ހުޅުވައިލައި ކުށުގެ ހާލަތާއި މުވައްޒަފުންގެ ކަންކަމާއި ގުޅޭގޮތުން މަޝްވަރާ ކޮށްފައިވާ ކަމަށެވެ.
އެގޮތުން ކުރިއަށް އޮތް ފަސް އަހަރަށް ފުލުހުންގެ ސްޓްރެޓެޖިކް ޕްލޭން އެކުލަވާލުމަށްޓަކައި ބާއްވަމުންދާ މަހާސިންތާ ތަކުގެ ތެރެއިން، ނޮދަން އޮޕަރޭޝަން ކޮމާންޑަށް ޚާއްސަކޮށްގެން ބޭއްވި މަހާސިންތާ ށ. އަތޮޅު ފުނަދޫގައި ބާއްވާފައިވާއިރު ސަދަން އޮޕަރޭޝަން ކޮމާންޑަށް ޚާއްސަކޮށްގެން ބޭއްވި މަހާސިންތާ ބާއްވާފައިވަނީ އައްޑޫސިޓީ ހިތަދޫގައެވެ.
ނޮދަން އޮޕަރޭޝަން ކޮމާންޑުގައި ހިމެނޭ ހއ، ހދ، ށ، ނ، ރ، ބ، ޅ. އަތޮޅުގެ އިތުރުން ކ. އަތޮޅާއި އއ، އދ، އަދި ވ. އަތޮޅަށް ޚާއްސަކޮށްގެން ބޭއްވި މަހާސިންތާ ފެބުރުވަރީ 12ން 14ށް ބާއްވާފައިވާއިރު، ސަދަން އޮޕަރޭޝަން ކޮމާންޑުގައި ހިމެނޭ މ، ފ، ދ، ތ، އަދި ލ. އަތޮޅުގެ އިތުރުން އައްޑޫސިޓީއާއި ފުވައްމުލައް ސިޓީއަށް ޚާއްސަކޮށްގެން ބޭއްވި މަހާސިންތާ ފެބުރުވަރީ 13ން 14ށް ބާއްވާފައިވަނީ ސ. ހިތަދޫގައެވެ.