ރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ފައިނޭންޝަލް އިންޓެލިޖެންސް ޔުނިޓް ހިންގުމުގެ އިސްވެރިޔާގެ މަޤާމަށް ބޭފުޅަކު އައްޔަންކޮށްފި އެވެ.
އެމްއެމްއޭ އިން މިއަދު ނެރުނު ބަޔާނެއްގައި ބުނެފައި ވަނީ އެ މަޤާމަށް ހަމަޖައްސާފައި ވަނީ އިބްރާހީމް އަޙުމަދު ނާޞިރު ކަމަށެވެ.
އިބްރާހީމް އަޙުމަދު ނާޞިރު ވަނީ މޯލްޑިވްސް ސްޓޮކް އެކްސްޗޭންޖް އަދި މޯލްޑިވްސް ސެކިޔުރިޓީޒް ޑިޕޮސިޓަރީ އުފެއްދުމުގައި އިސްދައުރެއް އަދާކުރައްވާފައެވެ. އަދި އޭނާ ވަނީ މި ދެ ކުންފުނީގެ ސީއީއޯގެ މަޤާމުގައި ތިން އަހަރު ޙިދުމަތްކުރައްވާފައެވެ.
މީގެ އިތުރުން އިބްރާހީމް އަޙުމަދު ނާޞިރު ވަނީ މޯލްޑިވްސް ޕޮލިސް ސަރވިސްގައި 11 އަހަރު ޙިދުމަތްކުރައްވާފައެވެ. އަދި އެމްއެމްއޭގެ ކްރެޑިޓް ގެރަންޓީ ޔުނިޓްގެ ހެޑް އަދި އެޗްއެސްބީސީގެ ޑެޕިއުޓީ ކަންޓްރީ މެނޭޖަރގެ ގޮތުގައި ވެސް މަސައްކަތްކުރައްވާފައިވެއެވެ.
ނާސިރަކީ އިކޮނޮމިކަލް ހިސްޓްރީއިން ބެޗްލަރސް ޑިގްރީ އަދި ޕޮލިޓިކަލް ހިސްޓްރީ އިން މާސްޓާރސް ޑިގްރީ ހާސިލްކުރައްވާފައިވާ ބޭފުޅެކެވެ.