2004 ވަނަ އަހަރު ނެރުނު ފިލްމް "ޑައުންފޯލް"ގައި ހިޓްލަރގެ ރޯލުން ފެނިގެންދިޔަ ސްވިސް އެކްޓަރ ބްރޫނޯ ގަންޒް މަރުވެއްޖެ އެވެ.
މަރުވިއިރު އޭނާގެ އުމުރަކީ 77 އަހަރެވެ. އޭނާގެ މެނޭޖްމެންޓާއި ހަވާލާދީ "ބީބީސީ" އިން ރިޕޯޓްކުރާ ގޮތުގައި ބްރޫނޯ މަރުވީ ހުކުރު ދުވަހުގެ ރޭ ޒޫރިކްގައި ހުންނަ އޭނާގެ ގޭގައެވެ.
ގަންޒް އަކީ ޖަރުމަނުގެ ސިނެމާގައި ވަރަށް މަޝްހޫރު އެކްޓަރެކެވެ. އޭނާ ވަނީ "ދަ ރީޑަރ" އާއި "ދަ މަންޗޫރިއަން ކެންޑިޑޭޓް" ފަދަ އިނގިރޭސި ފިލްމްތައް ވެސް ކުޅެފައެވެ.
އެހެންނަމަވެސް ގަންޒް އެންމެ ބޮޑަށް މަޝްހޫރު ވެގެންދިޔައީ "ޑައުންފޯލް" ގައި އެޑޮލްފް ހިޓްލަރގެ ރޯލް ކުޅުމުންނެވެ. އެ ފިލްމަކީ ހިޓްލަރ އޭނާގެ އުމުރުގެ އެންމެ ފަހު ދުވަސްތައް ހޭދަކުރި ގޮތާއި ބެެހޭގޮތުން އުފައްދާފައިވާ ފިލްމެކެވެ. އެ ފިލްމް ވަނީ ބޮކްސް އޮފީހުގައި 92 މިލިއަން ޑޮލަރަށްވުރެ ބޮޑު ފައިދާއެއް ހޯދާފައެވެ.
"ޑައުންފޯލް" އަށް ވަނީ ބީބީސީގެ "ފޯ ވާރލްޑް ސިނެމާ އެވޯޑް ލިބިފައެވެ. އަދި އެކަޑެމީ އެވޯޑްސްގައި ބެސްޓް ފޮރިން ލެންގުއޭޖް ފިލްމް ކެޓަގެރީ އަށްވެސް އެ ފިލްމް ވަނީ ނޯމިނޭޓްވެފަ އެވެ.
2005 ވަނަ އަހަރު "ދަ ގާޑިއަން" ނޫހަށް ދިން އިންޓަވިއުއެއްގައި ގަންޒް ބުނީ އެ ފިލްމްގައި ހިޓްލަރގެ ރޯލް އަދާކުރުމަށް ތައްޔާރުވުމުގައި އޭނާ ހަތަރު މަސް ދުވަސް ހޭދަކުރި ކަމަށެވެ.
ގަންޒް އެންމެ ފަހުން ފެނިގެންގޮސްފައި ވަނީ މިދިޔަ އަހަރު ރިލީޒްކުރި ފިލްމް ކަމުގައިވާ "ދަ ހައުސް ދެޓް ޖެކް ބިލްޓް" އިންނެވެ.
ރިޕޯޓްތައް ބުނާގޮތުން މަރުވިއިރު، ގަންޒް އަށް ވަނީ ގޮހޮރުގެ ކެންސަރު ޖެހިފައެވެ. ނަމަވެސް އޭނާ މަރުވި ސަބަބެއް އަދި ނޭނގެއެވެ.