މިހާރަކަށް އައިސް އަޅުގަނޑުމެންނަށް ދުވާލަކު އެތައް ބިރުވެރި ކަމަކާ ކުރިމަތިލާން އެބަ ޖެހެ އެވެ.
ޒަމާނީ ޑިމޮކްރެސީ އަށް އަޅުގަނޑުމެން މިހާރު ދަތުރު ކުރަނީ އޭ ބުންޏަސް އެކަމާ ގިނަ މީހުން ދެކޮޅެވެ. ސަބަބަކީ ޑިމޮކްރެސީ އަޅުގަނޑުމެންނަށް މި ފެންނަނީ މުޅިން ވެސް އެހެން ގޮތަކަށް ވާތީ އެވެ.
ޕާޓީތަކުގެ މެދުގައި ދެކޮޅުވެރިކަމާއި ހަނގުރާމަ ކުރާ މަންޒަރެވެ. މީހުން މެރުމާއި ވައްކަމާއި ފޭރުން ގިނަވާ މަންޒަރެވެ. ކުށެއް ނެތި އެތައް ބައެއްގެ ހައްޤަށް އަރާ މަންޒަރެވެ. ޤާނޫނާއި ޤަވާއިދަށް ބަޔަކު ބޯ ނުލަނބާ މަންޒަރެވެ. މިއީ އަޅުގަނޑުމެންގެ އަންނަން އޮތް ޖީލަށް ދެވޭނެ ނުރަނގަޅު ނަމޫނާއެކެވެ.
އަޅުގަނޑުމެންގެ ދިރިއުޅުމަށް އައި ބަދަލުތަކަކީ ސިޔާސީ މަސްރަހަށް އައި ބަދަލާއި އަޅުގަނޑުމެންގެ އިޤްތިސާދަށް އައި ބަދަލުތަކާ ގުޅިލާމެހިފައިވާ ކަންތައް ތަކެވެ.
މިގޮތުން ބަލާއިރު ރަނގަޅު ކަންތަކާ އަދި ވަރަށް ހިތާމަވެރި ޙާދިސާތަކެއް ފާއިތުވި އަހަރު ތެރޭގައި ހިނގައިފައި އެބަ ހުއްޓެވެ. މަގުމަތީގެ އަމަން ގެއްލިގެން މި ދަނީ ސިފައިންނާ ފުލުހުންނަށް ކޮންޓްރޯލް ނުކުރެވޭ ހިސާބަށެވެ.
އެންމެ ފަހުން ފުރާނަ ނަގާލުމުގެ ސިލްސިލާތަކެއް ވަނީ ހިނގައިގެން ގޮސްފަ އެވެ. ޤާނޫނު ހަދާ މަޖިލީހުގެ މެމްބަރަކާއި އަމަންއަމާން ކަން ބެލެހެއްޓަން ތިއްބަވާ ބޭފުޅުނާއި ޤާނޫނީ ވަކީލެއްގެ އިތުރުން ވެސް އެތައް ބަޔަކު ވަނީ މިކަމުގެ ޝިކާރައަކަށް ވެފަ އެވެ.
މި ފަރާތްތަކަށް މިއަދާ ހަމައަށް ވެސް އިންސާފެއް ނުލިބެ އެވެ. ހައްޔަރު ކުރާ މީހުން ވެސް އެކަމަށް އިއުތިރާފް ވިޔަސް މިހާރު ވާނެ "އެއްގޮތެއް ވެސް" ނެތެވެ. ޕާޓީތަކުން ކުށްވެރިންނަށް ހިމާޔަތް ދިނުމާއި އެ ބޭފުޅުންނަށް ހަރަދު ކުރާ ކަމަށް ވެސް ބައެއް ފަރާތްތަކުން ތުހުމަތު ކުރެ އެވެ.
ޕާޓީތަކަކަކީ ގޭންގްތަކަށް ވެއްޖިއްޔާ މި ޤައުމުގައި އެންމެ ބާރުގަދަ ބަޔަކަށް ވެސް ވާނީ އެންމެ ފާއިސާ ގިނަ ނުފޫޒު ގަދަ މީހުން ތިއްބަވާ ޕާޓީތަކަށެވެ.
މި ދަނޑިވަޅުގައި އަޅުގަނޑުމެންގެ އަމިއްލަ އެދުން ކުރިއަށް ނެރެ ސިޔާސީ ބޭނުން ތަކަށްޓަކައި ހުރިހާ ކަމެއް ނިންމާލުމަކީ އެންމެ ބުއްދިވެރި ގޮތަކަށް ނުވާނެ އެވެ.
މިޤައުމު ހަމަ މަގަށް އަޅުވަން ކޮންމެ މީހަކުވެސް މަސައްކަތް ކުރަން ވެއްޖެ އެވެ. ސިޔާސީ ބޭފުޅުން ރަނގަޅަށް ސިޔާސީ ގޮތުން ތަސައްރަފު ފުދި ރައްޔިތުންނަށް މިސާލު ދެއްކުމަކީ މި ވަގުތަށް ކޮންމެހެން މުހިންމު ކަމެކެވެ.
ސިޔާސީ ލީޑަރުން ވެސް އެއް މޭޒު ދޮށަށް ގޮސް ޤައުމަށާއި ދިވެހި ރައްޔިތުންނަށް މިހާރު ދިމާވެފައިވާ "ކުށުގެ ވެށި" ނައްތާލަން މަސައްކަތް ކުރަން ވެއްޖެ އެވެ.
އެހެން ނޫނީ މި ޤައުމުގައި ކުށް ކުރުން ގިނަވެ ރައްޔިތުން "ހަނާވާން" ގިނަ ދުވަހެއް ނުނަގާނެ އެވެ.