ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް އާއި ދެކޮޅަށް އަޑު އުފުއްލަވައި، އެމަނިކުފާނުގެ މައްސަލަ ޕޮލިހަށް ހުށަހަޅުއްވައި ކަންތައް ކުރެއްވީ އެއްވެސް ވައްކަމެއް ކުރައްވާފައި ނުވާތީ ކަމަށް ޔޫތު މިނިސްޓަރ އަހްމަދު މަހުލޫފް ވިދާޅުވެއްޖެ އެވެ.
މަހުލޫފް މިހެން ވިދާޅުވީ މިއަދު ކުރެއްވި ޓްވީޓެއްގަ އެވެ.
Yameen ge photo jehi dollar meymathee jahaigen,Dhoovehi kairiah fake dollar ukaa,Yameen ge massala police ah husha’alhaa hedhee vahkameh koffa noanaanethee.
Efadha kameh oiynama hureehee Yameen kairee thaashivefa.Efadhakameh oiynama eyru furathama jalah laane ekakakee alhugandu.— Ahmed Mahloof (@AhmedMahloof) February 17, 2019
އެ ޓްވީޓްގައި މަހުލޫފް ވިދާޅުވެފައި ވަނީ ރައީސް ޔާމީންގެ ފޮޓޯ ޖެހި ޑޮލަރު މޭމަތީ ހަރުކޮށްގެން، އެމަނިކުފާނުގެ ގެކޮޅު ކަމުގައިވާ ދޫވެހި ކައިރިއަށް ފޭކު ޑޮލަރު އުކައި، އެމަނިކުފާނުގެ މައްސަލަ ޕޮލިހަށް ހުށަހަޅުއްވައި ހެއްދެވީ ވައްކަމެއް ކުރައްވާފައި ނޯންނާނެތީ ކަމަށެވެ.
"އެފަދަ ކަމެއް އޮތްނަމަ ހުރީހީ ޔާމީން ކައިރީ ތާށިވެފައި. އެފަދަ ކަމެއް އޮތްނަމަ އޭރު ފުރަތަމަ ޖަލަށް ލާނެ އެކަކީ އަޅުގަނޑު"، އެ ޓްވީޓްގައި މަހުލޫފް ވިދާޅުވެފައި ވެއެވެ.
މަހުލޫފް މިހެން ވިދާޅުވިއިރު، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަންސް (އެމްއެމްޕީއާރްސީ)ގެ ޚިޔާނާތުގެ ފައިސާ އެކައުންޓަށް ވަން މައްސަލާގައި، މަހުލޫފް ވަޒީފާ އަށް ނުނިކުންނަވައި ގޭގައި މަޑުކުރައްވަން ރައީސް އިބްރާހިމް މުހައްމަދު ސޯލިހު ވަނީ އަންގަވާފައެވެ.
މަހުލޫފް ވިދާޅުވީ ގޭގައި މަޑުކުރައްވަން އެންގެވީ މި މައްސަލާގައި ވަކި ގޮތެއް ނިމެންދެން ކަމަށެވެ.
އޭސީސީން އެމްއެމްޕީއާރުސީގެ ޚިޔާނާތުގެ ތަފްސީލީ ރިޕޯޓު އާންމު ކޮށްފައިވާއިރު، އެ ރިޕޯޓުގައި ބުނެފައިވާ ގޮތުން ޚިޔާނާތުގެ ފައިސާ އިން މަހުލޫފްގެ އެކައުންޓަށް 33،000 ޑޮލަރު (539،700 ރުފިޔާ) ވަދެފައި ވެއެވެ.
މިކަން ހާމަވުމާއެކު މަހުލޫފް ކުރެއްވި ޓްވީޓެއްގައި ވިދާޅުވީ ވައްކަމެއް ކޮށްފައި ނޯންނާނެ ކަމަށާއި އަދި މައްސަލަ ބެލުމަށްފަހު ގޯހެއް އުޅޭނަމަ އިސްތިއުފާ ދެއްވާނެ ކަމަށެވެ.
މަހުލޫފް ގޭގައި މަޑުކުރައްވަން އަންގަވާފައިވާއިރު، ޔޫތު މިނިސްޓްރީ ހިންގުން ވަނީ ވަގުތީ ގޮތުން ޓޫރިޒަމް މިނިސްޓަރ އަލީ ވަހީދު އާއި ހަވާލުކޮށްފައެވެ.